Alberto Barandiaran kazetariaren erreportaje-sorta bati eman zaio III. Tene Mujika beka

DONOSTIA. DV. Alberto Barandiaran (Altsasu, 1964) kazetariak irabazi du Tene Mujika III. Beka. Bere kazetari-ibilbidean giltzarri gertatu diren bost erreportajetako gaiei berriro helduko die Barandiaranek, horretarako urtebeteko epea izango duelarik, eta gero emaitza liburu moduan argitaratuko da.

Debako Udalak eta Elkar argitaletxeak sortutako beka da. Sei mila euro du zenbatekoa. Lehenengo deialdian Ramon Olasagasti kazetarik irabazi zuen eta mendian hildako mendizale ba-tzuen biografiekin osatu zuen Mendiminez liburua. Bigarren deialdian, iaz, bekarik ez zen eman, proiektuek maila eskasa zutelako.

Biolentzia politikoa dute oinarrian Alberto Barandiaranen bost erreportaje horiek. «Bostak nire kazetaritza esperientziarekin lotuta daude. Bostak nik egindako erreportaje edo kroniketatik sortu dira (edo egin ez ditudan erreportaje eta kroniketatik). Bostak obsesio txikiak dira», esan zuen kazetariak atzoko aurkezpenean.

Lan berriari Atea itxi ezinik jarri dio behin-behineko izenburu. Berria-rako ari da lanean Barandiaran, kronika- eta narrazio-liburuak ere baditu argitaratuak eta bi kazetaritza-sari jasotakoa da: Rikardo Arregi eta Argia sariak.

Erreportajeetako batek, Higinia Luz Aiestaranen argazki galdua-k, Ziraukin (Nafarroan) jaio eta Auschwitz hildako emakume baten historia agertuko du, eta kontzentrazio-zelaian egindako argazki galduari buruzkoa. Cordobako senidea-k, berriz, Argentinako diktaduran desagertutako euskaldunei buruzkoa da. «Egin nuenean erreportaje hura, ikerketa amaitzekotan zela, Cordobatik egindako deia jaso nuen Buenos Airesen -1.500 kilometroko distantziatik- beste kasu baten berri eman nahirik. Ez nuen azkenean erreportajean sartu, burua oso nekatua bainuen, baina barruan harra geratu zitzaidan».

Beste erreportaje bat Nicolasa Agirrezabalagaren gurutzea izango da. Hor Gumersindo Lizarrako kaputxinoaren historia kontatuko da. Hirurehun preso baino gehiago konfesatu zituen 1937tik 1941era, Zaragozako presondegian. Haietako bat, bereziki hunkitu zuena, Nicolasa Agirrezabalaga Amuntxategi izan zen, 22 urteko mutrikuarra.

Jesus Ulaiarren garaia-n bi garai agertuko dira: 1979 (ETAk orduan hil zuen Etxarri Aranazko alkate zen gizon hura) eta 2004 (Basta Ya elkarteak omenaldia egin zion bere herrian). Martxoaren 11ko bi ordu delakoan, berriz, irratian atentuaren berri jakitean pasatako lehenengo lehenengo bi orduen kronika egingo du Barandiaranek.

Lorea Agirrek, Elixabete Garmendiak eta Pruden Garziak osaturiko epaimahaiak aho batez erabaki zuen Barandiaranen proiektua saritzea.