Zomorro festa

DV. Haurrentzako albumak sortzeko III. Etxepare Beka Iñaki Zubeldia eta Estibaliz Jalónen proiektuari eman zaio. izenburuko album hori, guztiz gauzatzen denean, udazkenean plazaratuko du Pamiela argitaletxeak.

Albumetan, jakina denez, oso estua izaten da testuen eta ilustrazioen arteko harremana. Eta irudiek garrantzi handia eduki ohi dute. Produktu garestiak izaten dira eta, euskarazko merkatua oso zabala ez denez, azkenean haurrentzako album gutxi egiten da. Horregatixe jarri zuten abian Etxepare Beka Nafarroako hainbat herritako Euskara Zerbitzuek.

Saritutako proiektuan, testua Iñaki Zubeldia ikaztegietarrarena da. Protagonista nagusiak bi animalia dira: Katalina izeneko txitxar berritsua da eta Matxin deritzan matxinsalto hankaluzea. Zomorroen ezaugarrietan dago oinarritua istorioa; kontatzen du nondik datorkien kolorea amona mantangorriei eta tximeletei.

Ibilbide luzeko idazlea da Iñaki Zubeldia (Ikaztegieta, 1945), batik bat haur eta gaztetxoentzako istorioak idatzi dituelarik. 1982an publikatu zuen aurreneko liburua, , eta harrezkero Pako beleari buruzko zenbait istorio plazaratu ditu. Azken urteotan Ibaizabalen bidez plazaratu izan ditu bere emai-tzak.

Estibaliz Jalón askoz gazteagoa da. Orain 24 urte ditu eta duela hiru bukatu zituen ilustratzaile ikasketak, Logroñon. «Iñaki Zubeldia ezagutzen nuen lehendik. Bere bi liburutako ilustrazioak eginak nituen: eta », adierazi digu.

Oso estilo berezia, antz ematen erraza, dauka Jalónek. Eskuz egiten ditu marrazkiak, guasch pinturak eta akuarelak erabilita. Kolore biziak ez ditu maite, eta marrazkiei halako poetikotasun malenkoniatsua darie. «Askotan, irudiei zahar kutsua emateko, kafea eta tea erabiltzen ditut; nik asmatutako teknika da», adierazi digu, harro, Arabako hegoaldean jaio -Yecoran- eta Gasteizen bizi den gazte honek.

Orain badauka lana ko marrazkiak egiten. Izan ere, beka horretara lagin txiki bat baino ez zen aurkeztu behar.

Bekaren hirugarren deialdia izan da oraingoa, eta saria 6.000 eurokoa. Lagun hauek jardun dira epaile lanean: Patxi Zubizarreta, Arrate Egaña, Mikel Valverde eta Aitziber Alonso.