Bertsotarako Arbel Digitala egin dute IXAk eta Bertsozale Elkarteak

Bertso-Eskola Digitala webgunea aurkeztu du gaur Donostian Bertsozale Elkarteak. Horko ataletako bat Bertsotarako Arbel Digitala da, bertsoak idazten laguntzen duen programa, Euskal Herriko Unibertsitateko IXA taldeak prestatua. Beste ataletako bat Bertso-Eskolen Mapa da, Euskal Herriko eskola guztien berri ematen duena, eta tresna egokia haiekin harremanetan jarri nahi duenarentzat.

Euskal Herriko Bertsozale Elkartea eta EHUko IXA taldea elkarlanean jardun dira webgune hau garatzeko. Bertara ekarri dira Elkartearen Xenpelar dokumentazio-zentroko hainbat material, besteak beste doinutegia. Aipatutako bi atalez gain, Bertsolaritzaren Mapa izenekoa erre eskaintzen du web horren, non herri bakoitzean dagoen bertso-mugimendua deskribatzen den. Tresnak izeneko atalean, berriz, agenda, biografiak eta beste azalpen batzuk eskaintzen dira.

Manex Agirrezabal informatikaria izan da Arbel Digitalaren arduradun nagusia. Bertsozale Elkartearen izenean, berriz, Aritz Zerain koordinatzailea eta Transmisio Saileko Ixiar Eizagirre mintzatu dira gaur Donostiako KM Kulturunean egin den aurkezpenean.