«Osinbeltzeko gaiarekin oso zorrotzak izango gara», dio Udalak

Osinbeltz inguruko gordelekua dela eta herrian sortu den egonezina medio, Udalak zenbait kontu adierazi nahi ditu: horrela, «Diputazioak erabaki du Osinbeltz harrobi ohia izatea inertizatutako materialentzako gordelekua. Oraindik prozesu hau hasi besterik ez da egin. Izan ere, Lurralde Arloko Plana (PTS delakoa)aldatu behar da, proiektua idatzi, abar... Guk garbi dugu izan beharreko informazio guztia izan behar dutela zestoarrek prozesu honetan , eta beraz, horixe eskatuko diogu Diputazioari. Udal honek beti egin du zestoarren interesen defentsan, eta gauza bera egingo du oraingoan ere», dio Udalak, momentu honetan gai honen inguruan informazioak duen garrantzia azpimarratzeko orduan.

Segidan, «horregatik, Diputazioarekin harremanetan gaude, eta honek datorren astetik aurrera astean bi aldiz Zestoara etorriko dela iragarri digu. Auzoetan ere izango da, informazioa eman eta herritarren galderei eta zalantzei erantzuteko», plazaratu nahi du.

Jarraian, «Oraindik prozesu hau luze joango da. Guri dagokionez, akordio proposamen bat luzatu digute, Zestoari bermea emateko, eta ondo aztertu behar dugu gaia. Proiektua eta xehetasunak ezagutu behar ditugu, Eusko Jaurlaritzaren iritzia ere bai -hark ematen duelako ingurumen baimena-, Europan dauden antzeko biltegian berri ere izan nahi dugu...informazio guzti guztia izan nahi dugu , eta informazio hori herritarrekin konpartitu», dio Udalak.

Azkenik, «horregatik Diputazioak bere bilerak egin eta informazioa ematen duen heinean, Udalak herritarrekin egon nahi du eta haien kezkak eta iritziak jaso. Gai honekin oso zorrotzak eta exigenteak izango gara», azpimarratu nahi du Zestoako Udalak.