Udalak «herritarren interesen defentsan» arituko dela dio

Zestoako Udalak honako gogoeta hau egiten du osinbeltzen harrobiaren inguruko azken egunetako berrien inguruan.

«Zestoako Udalak oso garbi du gai honetan zestoarren interesen defentsan arituko dela eta ez duela onartuko Zestoarentzat kaltegarria izan daitekeen inongo proiekturik. Informazioa jasotzeko prozesuan gaude, baina nabaria da herritarren artean mota guztietako iritziak daudela proiektuaz, eta, oro har, haien iritzia kontuan hartzea eskatzen ari direla. Horregatik, Foru Aldundiari zestoarren iritzia errespetatzea eskatu diogu; joan den asteartean egin genuen modu publikoan herriko kiroldegian herritarrekin egindako batzarrean. Foru Aldundiak baietz esan digu, zestoarrek izango dutela Osinbeltz harrobiko proiektuari buruzko azken erabakia, eta gure-tzat neurri zuzena da», dio Udalak.

«Lehenik, proiektua egin beharko da, eta Zestoako Udalak eta zestoarrek prozesu hori jarraitzeko eta helegiteak edo hobekuntzak aurkezteko aukera izango dugu; Eusko Jaurlaritzaren baimena ere beharko du proiektu horrek, eta ondoren, Foru Aldundiak prozesu parte-hartzailea eta herri galdeketa egingo du. Eta gaur egungo Foru Gobernuak galdeketaren emaitza errespetatzeko konpromisoa hartu du. Orain arte egiten ari den bezala informazioa zabaltzeko eta bide horretan jarrai-tzeko eskatu diogu Foru Aldundiari, zestoarrek ahalik eta informazio osoena jasotzeko eskubidea dutelako», azaldu du.

«Gure ustez, prozesu egokia da, azkenean geuk, zestoarrok, erabakiko dugulako biltegia jartzeko eta harrobia berreskuratzeko proiektua nahi dugun ala ez, eta alde horretatik, demokratikoa dela uste dut. Gogorarazi nahi dut Udal Gobernu honek berak beste galdeketa bat egin zuela zezenketei buruz, eta orain, galdeketa honekin, demokraziaren bidean sakontzeko beste urrats bat emango dugula herrian: osasuntsua da herritarrei hitza ematea eta demokrazia parte-hartzailearen praktikak gauzatzea. Uste dut Zestoa adibide ona dela alde horretatik», adierazi du.

«Eta horregatik, gogorarazi nahi dut, baita ere, gure herriak errausketari buruzko beste galdeketa bat egin zuela, eta galdeketa hartan, botoa eman zutenen %91 errausketaren kontra eta birziklapenean oinarritutako beste sistema baten alde agertu zela. Galdeketa haren emaitza errespetatzea ere betebehar demokratikoa da. Alde horretatik, esan nahi dut, baita ere, Zestoan % 82 birziklatzen dugula eta zestoarrok oso harro gaudela horretaz eta oso garbi dugula hondakinen kudeaketa egoki baten oinarria ahalik eta gehien birziklatzea dela. Zestoarron ahotsa entzun behar da, noski, eta eremu eta gai guztietan entzun behar da; Osinbeltzeko proiektuaz, baina baita errausketaz edo hondakinen kudeaketaz ari garenean ere. Beraz, demokraziaren bidean beste pauso bat ematen ari garela uste dut», dio Leire Etxeberria, Zestoako alkateak.