Nork hil du Andoni Egaña?

«2013an Antxokak deitu zidan bere aldizkariarekin kolaboratzeko eskatuz. Nik ez nekien bertsotan eta gainera, nire aurreko lana izan zen Pololoak trilogian euskal topikoak kiitikatzen nituen, haien artean bertsolaritza», kontatu du proiektuaren hastapenaren inguruan Patxi Gallego marrazkilariak. «Dei hura jaso aurretik unibertsoari eskaera bat egin nion: bizitza guztian marrazten jarraitu nahi nuen. Beraz, proposamenari baiezkoa eman eta segituan Xabi Paya etorri zitzaidan burura. Hark seguruenik izango zituen bertsoen inguruan ideia onaketa hala izan zen», jarraitu du artistak. «Orduantxe elkartu ginen eta segituan sexua edo hilketa bat gure istorioaren abiapuntu izango zirela erabaki genuen eta, azkenean, Andoni Egaña hil genuen komikiaren lehen orrian».

Euskal gizartean ezagunak diren ehun pertsonaia baino gehiago azaltzen dira Nork komikiaren 142 orrialdeetan, Etxenike doktorea eta Paco Etxeberria forensea, besteak beste. Halaber, Egañaren hilketa ikertzeko euskal gizartearen ikuspegi desberdinak pertsonifikatzen dituzten lau detektibe sortu dituzte bi egileek: kontserbadore eta purista den Amezketako aguazila, ikuspegi emotiboa duen Galdakaoko Kontxi etxekoandrea, euskal identitatearen baitatik nolabait irtenda lesbiana eta iparraldeko euskalduna den Amaia Ezpeldoi eta, azkenik, euskal pragmatismoaren adierazpide den Iron Man moduko robota. «Euskal kulturari buruzko gogoeta sustatu nahi dugu eta denetariko pertsonaiak sartu ezin diren arren, jarri ditugunak adierazgarriak dira», azaldu du Xabi Payak.

«Erronka handia izan da neretzat», gehitu du aldi berean Donostia 2016 proiektuaren koordinatzaile denak. «Bi urte lanean igaro ondoren, orain ez dakit zer egin nere denbora librean, esan du txantxetan Patxi Gallegok. Etorkizunari begira, izenburuak agian trilogía bat egiteko aukera emango digu», gehitu du marrazkilariak. «Nor-nori-norknork daki?».