Mugikorretara iritsi da euskarazko lan-atari bakarra

Izan zaitezke euskaraz lan egin nahi duen eta lan bila dabilen pertsona, edo langile euskaldunak nahi dituen enpresa edo erakundea. Bat izan zein bestea, probetxuzkoa gertatuko zaizu Bai Euskarari Elkarteak eskaintzen duen Lansarea ataria, euskarazko lan-atari bakarra.

Orain arte internet bidez erabil zitekeen atariak telefono mugikorretarako aplikazioa estreinatu du. Arduradunek diotenez, «4.000 lan-eskaintza, 400 enpresa eta 2.900 erabiltzaile baino gehiago jaso ditu webguneak eta, oraingoan, tresna berriarekin, pauso bat harago eman nahi izan du Bai Euskarari Elkarteak, ibilbide profesionala euskaraz garatu nahi duenari eta lana eskaintzen dutenei erraztasunak ematen jarraitzeko«.

Esan bezala, bi publiko mota ditu lansareak: alde batetik, enpresa, saltoki eta era guztietako entitateei, lan-eskaintzak zabaldu eta hautaketa-prozesuak arinago kudea ditzaten; eta, bestetik, lan bila ari diren pertsonei, euskarazko eskaintza profesionalak modu pertsonalizatu batean jaso eta hobekien egokitzen zaien lana topa dezaten. Bien kasuetan, Google Play eta App Store-n deskarga dezakete tresna berria, doan.

«Lana euskaraz bilatu, lana euskaraz eskaini eta euskaraz lan egin nahi duen komunitateari tresna eta baliabide berriak eskaini nahi zaizkie, haien beharretara eta lan-kudeaketa ohituretara egokiturik. Jakin badakigu gaur egun, pertsona gehienek aplikazio eta mugikorren bidez egiten dituztela Internet bidezko bilaketak, erosketak, erreserbak, etab. Hori horrela izanik, sakelekoetatik edo tabletetatik lan-eskaintzak euskaraz kudeatzeko aukera eskaintzen du aplikazio berriak«, adierazu du Bai Euskarazek.

Rober Gutiérrez Bai Euskarari Elkartearen zuzendariak nabarmendu duen bezala, «euskara eremu sozio-ekonomikoan txertatzea eta erabiltzea funtsezkoa da egunerokoan normaltasunez aritzeko eta hizkuntzaren biziberritzerako. Lan munduan euskara sustatzeko urratsak ematen ari dira, baina erdara da nagusi oraindik ere enpresa eta lantoki gehienetan. Bestalde, hezkuntza-arloa euskalduntzeko egindako inbertsioak ez du segidarik izan arlo sozio-ekonomikoan. Gero eta gehiago dira euskaraz ikasi duten eta trebatu diren pertsonak, belaunaldi berriak prest daude euskaraz lan egiteko, baina, lan munduak horretarako aukera gutxi ematen die. Lan arloan euskaraz normaltasunez aritzeko baliabideak sortu eta garatu behar dira. Euskaraz lan egin ahal izateko ezinbesteko baldintza baita, pertsonak eta espazioak euskararekin betetzeaz gain, baliabideak eta tresnak ere euskaraz egotea eta horiek baliatzea».