Etorkizuneko Euskal Herria irudikatuz

Eusko Ikaskuntzak 'Hiri sortzaileak: egoerak eta etorkizunak' gizarte berrikuntzarako proiektua abian jarriko du etorkizuneko gizartearen inguruan gogoeta sustatzeko. Testuinguru honetan, hainbat foro parte-hartzaile egingo dira Jean Michel Larrasquet-en zuzendaritzapean. Lehenengoa, hain zuzen ere, Donostian izango da ostegun honetan, ekainaren 23an, Carlos Santamaria Zentroan, goizeko 10etatik arratsaldeko 17:30ak arte.

Egitasmoaren izenburuak dioen moduan, foroetan hirien egoera eta etorkizuna landuko da. Horretarako, 10-12 pertsonez osatutako taldeak egingo dira, non gizarte-jatorri, bizipen eta adin desberdinak bilduko diren. Parte- hartzaileak herritar zein adituak izan daitezke eta bere iritzia eman ahal izango dute foroan azalduko den gaiaren inguruan.

Proiektuak bi helburu ditu, Eusko Ikaskuntzak aditzera eman duenez. Batetik, "Euskal Herriko herritarroi eragiten diguten gaiekiko axolagabekeriari eta atxikimendurik ezari aurre egitea. Horretarako, pertsonei lagundu nahi diegu etenaldia, gogoeta, elkarrizketa eta elkarbizitza lantzen". Bestetik, "gizarteak berak kontaketa inpresionistaren ikuspegitik balizko eszenario desiragarriak asmatzea eta kontatzea, emaitza berritzaileak eta erabilgarriak lortzeko".