Glaukomaren itzal erakargarrian

Reggae eta rap doinuek badute zeresana gure eskualdean. Glaukoma gaztea da, baina ibilbide laburreko taldeak, ordea, itzal luzea egin du inguruan, eta zer esanik euskal musikagintzan. 2014 urte oparoa izan da talde tolosarraren-tzat; hala nola, 50 kontzertu inguru eskaini ditu, eta iragan urtearen amaieran, etxean hasi eta bukatu du Glaukomak 'Vol.2' diskoaren kon-tzertu-bira.

Taldearen musikak eboluzio logikoa izan du argitaratutako lanetan. 2012an heldu zen taldearen lehen diskoa ('Vol.1'), sinesgarritasun handiz egindako reggae, rap eta ragamuffina euskaraz, gaztelaniaz eta ingelesez. Sasoi batean isilik egon ostean, 2013ko udazkenean 'Vol.2' eman zuen argitara, eta Japonian ekin zioten kontzertu-birari. Taldekideek diote disko honen sorkuntza-prozesua luzea izan zela, eta nolabait lehen diskoan urratutako bidea sendotzea izan duela helburu. Horrela, bada, 2013ko otsailean hasi eta abuztura arte aritu zen taldea kantuak sortzen kontzerturik eman gabe. 'Vol.2'k rap eta reggae soinuetatik harago, soinu 'elektronikoagoa' bilatu ditu distortsioa, pedalak eta delay-efektuak erabiliz, eta jungle, drum&bass eta dubstep estiloak landuz. Horrela, bada, taldearen ezaugarri bereizgarri bilakatu dira dancehall eta raggamuffin doinu melodikoak.

Denbora igaro da taldea musika-estiloa ondu eta zabaltzen hasi zenetik -2010ean elkartu ziren lehen aldiz-, eta esan daiteke bide horretan taldeak eragina izan duela erregistroaren susperraldi berrian. Urtebeteko epean jada euren musika eta kantuen hitzak euskal gazte gehiengoaren ahotan daude, eta generoari ekarpen berezia egiten ari da musikalki, nahiz eta adierazten duten oraindik orain, hip hop-ak underground ezkutuenean jarrai-tzen duela.

«Azken urteetan jendea irekiagoa nabari dugu rap eta reggae musikara. Bestalde, uste dut euskarazko rapa momentu historiko eta interesgarrian dagoela egun. Are gehiago, raparen historia orain ari da gertatzen Euskal Herrian. Generoa inoiz baino indar handiagoz ari da zabaltzen, baina, zoritxarrez, oraindik ez du behar adina babes, eta presentzia ez da proportzionala. Musikaren industria osatzen duten betiko diskoetxeak, sustatzaileak, komunikabideak betiko formularen apustu egiten jarraitzen dute».

Abeslariaren hitzetan, azken urteetan egindako bidea eta jarraitutako estrategia arrunta izan da, eta inguruko jendearen babesa zein laguntza, berriz, ezinbestekoa. «Bigarren diskoa kaleratzean, lehenengoarekin emandako pausoak jarraitu ditugu. Hasteko, promozio txiki bat egin genuen, elkarrizketak finkatuz Bilboko, Donostiako eta Gasteizko hainbat komunikabiderekin, eta ondoren zuzenekoak adostu. Gainontzekoa, ordea, pixkanaka iritsi da. Promoziorik onena ahoz ahokoa. Gure kasuan, horrela iritsi gara jendearengana. Lan hori kontzertuen bitartez egiten saiatu gara, hori baita gure helburua, eta talde ororen nahia musikari izanik ».

50 kontzertu urtebetean

Hasiera ezin hobea izan zela oroitzen dute taldekideek. Bonberenean diskoa aurkeztu ondoren, Japoniara bidaiatu zuten eta urte berriaren hasieran, otsailetik aurrera, hain zuzen, hasi ziren zuzenekoen zerrenda osatzen. 50 kontzertu eskaini ondoren, ordea, taldeak bira etxean amaitu nahi izan du, eta Bilboko Kafe Antzokian Black is Beltza jaialdian jo ostean, Bonberenea aukeratu zuen. «Bizkaiatik hasita, Gipuzkoa eta Gazteisko eszenatoki gehientsuetara igo gara, eta Nafarroa, Zaragoza, Andaluzia eta Benicàssimeko Rototom Sunsplash jaialdian ere izan ginen. Urte amaiera indartsua izan da, eta harro gaude erantzunarekin».

Epe laburrera, oraingoz, taldeak ez du zuzeneko gehiagoren data berririk zehaztu. Atseden apur bat hartu ondoren, asmo berrien garai berria hasiko da eurentzat, eta nahiz eta oraindik etorkizunean egingo dutenaren ideia argirik ez eduki, Juantxo Arakama tolosarrak dio konposatzen jarraitzeko gogoz daudela. «Argi daukagu zein den gure filosofia. Guretzat momentuan momentukoak du garrantzia, eta jakin badakigu etorkizunari aurre egin behar zaiola hurrengo momentuak eskatzen duenaren arabera. Sorkuntza-prozesuak egunerokotik ateratzea eskatzen dizu, eta guk musika afizio modura bizi dugu; beraz, ikusiko dugu».