Aimar Agirresarobe triatloilaria hirugarren Espainiako Txapelketan

«Nire triatloi ibilbideko emaitzarik onena da, izugarrizkoa», pozarren zen igandean Aimar Agirresarobe tolosarra (Krafft AtSS) Gasteizko triatloiko podiumetik jaitsi berritan. Distantzia Ertaineko (1900m-91km-21km) Espainiako Txapelketa zen, eta hirugarren egin zuen. Blanchart eta Calle kataluniarrak besterik ez zituen aurretik izan. Berak ondo agertu bezala sekula lortu duen emaitzarik onena.

Atzetik aurrerako proba osatu zuen. Ulibarriko urtegian egin zen igeriketa saioa lasterketa buruagandik 3 minutura amaitu zuen (26:33), lehen hamarrez atzera irten zen uretatik. «Ez naiz sekula eroso sentitu, baina irtetean nire denbora galera normala zela ikusi dut eta inguruan betiko triatloilariak nituela. Bizikletan apustu egitea erabaki dut orduan eta ondo atera zait», zioen. Bai ondo ere!

Bizikletan bera izan zen azkarrena (2.15.56) hasieratik topera jo zuen asko arriskatuz eta tropela atzean utzi zuen. Gasteizen bertan korrika hasterako hirugarren postuaren lehian zen Alejandro Santamaria madrildar beteranoarekin batera. Korrikalari bikaina da hura eta gainera Aimarri kosta egin zitzaion bizikletako esfortzuari buelta ematen. Hala, lehen kilometroetan ihes egin zion Santamariak, baina 14. kilometro inguruan Aimar tartea jaten hasi zitzaion eta amaitzeko 2 kilometro faltan harrapatu zuen. «Eraso pare bat jo nizkion eta bigarrenean atzean utzi nuen. Bakarrik helmugaratu nintzen». Korrikako saio bikaina osatuta beraz (1.18.18), Aimar hirugarren sartu zen helmugan 4.00.47ko denborarekin. Eta atzetik aurrerako horretan ez zuen urruti izan bigarren postua ere, 44 segundo besterik ez zizkion atera Callek. Helmugaratu ahala zain zituen lehen biak, eta zorionak eman zizkioten osatutako probagatik. Espainiako Txapelketako sorpresa nagusia izan zen Aimar. Lasterketa bikaina burutu zuen.

«Denboraldi hasieratik distantzia ertain eta luzeen aldeko apustua egin nuen. Orain arteko emaitzak onak izan dira, Garai-ko triatloiko lehen postua tarteko, baina probarik garrantzitsuena hau zen eta ezin hobeto atera da», zioen. Igandekoarekin babesle berrien artean kotizazioa asko igo du Alegian bizi den tolosarrak.

Abuztuaren 7an du denboraldiko bigarren erronka nagusia: Alemaniako Iron Man proba Regensburg hirian. Iazko oroitza eta marka ona (9:17) gainditzea ditu helburu.

Vaquero bigarren

Alberto Vaquero (Mahala-Tolosaldeko TT) ere punan ibili zen Gasteizen. Elitean ez baina adin taldeen proban hartu zuen parte berak, eta 30-34 urte bitartekoen artean Espainiako Txapelunorde izan zen 4.23.15eko denborarekin.

Duela bi urte Gasteizen bertan, baina distantzia luzean, Txapeldun izan zen, beraz bere maila bikaina baieztatu zuen igandeko emaitzarekin. Hiru aste atzerago egindako Austriako Iron Manetik ondo errekuperatzen asmatu zuen, bai horixe!