Alizia Osa zinegotzia PSEen adierazpenekin, «desadostasunean»

Ingurumen zinego-tzia den Alizia Osa ez da konforme geratu PSEren adierazpenekin. «Dirudienez, zinismoa da PSEren ideologia bakarra. Zinikoa baita Bilduk ez duela birziklatu nahi adieraztea. Badakite gezurra dela eta hala ere adierazi egiten dute, inolako lotsarik gabe», dio.

Aliziak adierazten duenez «alde batetik, Bilduk apustu garbia egin du birziklatzearen alde». Datuak erakutsi besterik ez dago: Alderdi Sozialista gobernuan egon zen bitartean, bio-hondakina bereizten zuten familiak Zarautzen 1.600 ziren. Eta bilketa selektiboaren tasa %35ean zegoen. Hori diote datuek. Bilduk bio-hondakina birziklatzeko kanpaina bat egin zuen eta lehen olatuan 3.246 familiak eman zuten izena. Horri gehitu behar zaielarik, pasa den asteazken, ostegun, ostiral eta larunbatean gehitu ziren 985 familiak».

«Nork birziklatu nahi duen» galdetzen du Alizia Osak eta «nork ez?» «Bilduk erabaki ausartak hartuko ditu ahalik eta gehien birziklatzeko, ez izan zalantzarik. Eta egon ziur, zeuk lortu zenuen bilketa selektiboko %30etik eta 2011ren amaieran birziklatzen zen %36tik oso gora egongo garela denbora laster baten barru». Bilduk «erabaki ausartak» hartuko dituela esan du, eta horrek agerian uzten du (dagoeneko nabarmen geratu ez bada) «PSEren erraustegiaren aldeko egindako apustua (eta birziklatzearen alde erakusten duen itxurakeria), eta horregatik agertzen da hain urduri. PSEk gutxi birziklatu nahi izan baitu, gero erraustegian zer errea izateko, eta apustua gaizki ateratzen ari zaio. Bere alderdikideak ere konturatu ari direlako erraustegia ez dela bidea».

Errausketaren aurka

Osak dioenez «Nik dakidala Odon Elorza, PSE alderdikoa da oraindik eta guk, konturatu ez bazarete, Donostiako alkate ohiak 2005ean esaten zuenaren oinarriarekin bat egiten dugu: errausketarik ez, birziklapen tasak igo, bio-hondakina sailkatu. Ez dakidana da, 2005. urtean Odon Elorzak hau esan zuenetik, ze ezkutuko interes daukazuen orain, berehala, erraustegia eta birziklatze tasa txikiak defendatzeko.

Zer gertatu da denbora honetan zehar, noren interesen menpera zaudete?»

«Baina okerrena da» dio «Odon Elorza ez dela zuen alderdi barruan salbuespena. Martxoaren 2 honetan, PSNko Roberto Jimenezek erraustegia Nafarroan hondakinak kudeatzeko aukeretatik baztertu zuen. Nafarroan bai eta Gipuzkoan ez, ze irizpide ezberdin ditu PSEk hondakinen inguruan?

Alta, ez da Euskal Herriko kontua bakarrik, «Galizian gauza bera adierazi dute pasa den astean, eta Gaztela eta Leonen urteak daramatzate erraustegirik ez dutela nahi eskatzen, PSOE barruan. Horrek gauza bat uzten du agerian: Zarauzko PSE, Denis Itxasorekin batera, bere alderdi barruan ere, bakarrik ari da geratzen erraustegiaren alde» azpimarratzen du Osak.

Usurbilgo Itunarekin bat.

«Zalantzarik baldin baduzue, esango dizuet, hainbat alderdi eta eragilek bezala (Zarautzen Ezker Batuak -orduan-, Aralarrek, ELAk, LABek, Arkamurkak, Greenpeacek eta Uztaro nekazaritza kooperatibak, besteak beste), Zarauzko Bilduk ere, Eusko Alkartasuna eta Ezker Abertzalearen babespean, Usurbilgo itunarekin bat egin zuela 2010eko Azaroaren 5ean. Bertan, lehenik eta behin, zaborren kudeaketa eredua aukeratzeko orduan osasuna lehenetsiko dela berresten zen, ekonomia faktoreak ere kontuan hartuko zirelarik. Horrez gainera, aipatu bezala, Urtetako zabortegiari dagokionean, lege eta zuzentarauetan adierazita dagoenez, zabortegiaren itxiera aldarrikatzen genuen. Osasun, ingurumen eta ekonomia arrazoiak direla medio, erraustegiaren aukera baztertu egiten genuela eta hondakinen kudeaketaren inguruan, hondakin gutxi sortzea, berrerabiltzea eta birziklatzea bezalako balioak eta kontzeptuak landuko zirela genioen. Eta, azkenik, Zarautzen bezala Gipuzkoako herri denetan 'zero zabor' programa ezarri eta hau garatzea eskatzen genuen, bilketarako alternatiba osasuntsuago eta ekonomikoagoak bultzatuz.

«PSEk ze jarrera du honen aurrean? Behingoagatik aukeratu beharrean zaudete: birziklatu ala erraustu. Birziklatu nahi baduzue, ez izan zalantzarik, gure eskua luzatua duzue elkarlanean aritu eta bidea egiteko. Bestela, geuk birziklatzearen bidean jarraituko dugu, ausart eta eraginkor, irtenbideak aurkituz eta arduraz jokatu nahi dutenekin elkarlanean».

Amaitzeko, Aliziak dio «ingurumena, osasuna eta herriaren ekonomia hobea bilatzen dituztela urrats horiekin, baina oraindik ez dakitela PSEn interesak zeintzuk ote diren».