Inprobisazio-txapelketa egingo da Artelekun

Inprobisazio txapelketa nazioartekoa antolatu dute Artelekun. Edozein joeratako musikari, dantzari, aktore, bertsolari, poeta, performer, idazle, artista edo pertsonak har dezake parte, eta interesatuek helbide honetan eman dezakete izena: audiolab.arteleku@gmail.com

Parte-hartzaileek, bertsolari txapelketen moldean oinarritutako ariketa batzuk gauzatu beharko dituzte: Binaka ofizioka (zozketa bidez bi inprobisatzaile aukeratzen dira eta hauek antolatzaileek proposaturiko gai baten inguruan inprobisatuko dute); Banaka puntua emanda (antolatzaileek hasiera ematen diote piezari, partehartzaileak hari horri jarraituz inprobisatu beharko du); Hirunaka puntuka (gai librean baina molde laburrean hirunaka egin beharreko inprobisazioa); Kartzelako gaia (denek gai bera izango dute bakarka inprobisatzeko).

Parte-hartzaileek erabiliko dituzten instrumentuak, doinuak, estiloak eta abar libreak dira.

Lehiaketa Donostiako Artelekun bertan jokatuko da, abuztuaren 4an, larunbata, eta kanporaketa beharko balitz, bezperan egingo da hura.

Saria, berriz, txapela eta Juanjo Aranguren eskultoreak egindako garaikurra.