Danele Sarriugarte elgoibartarrak irabazi du Igartza Saria

Danele Sarriugarte elgoibartarra izan da aurtengo Igar-tza Sariaren irabazlea. Hamabi proiektu aurkeztu dira CAF enpresak eta Beasaingo Udalak antolatutako beka honetara, eta 'Mamuak' izenburuko eleberri-proiektua aukeztu du Sarriugartek, non haustura sentimentala pairatu duen emakume gazte baten gogoetak agertzen diren.

Beka 6.000 eurokoa da. Danele Sarrigarte Mochalesek 23 urte ditu eta aurretik libururik argitaratu gabea da. Itzulpengintzan lizentziatua, martxo hasieratik intzulpengintzari buruzko webgunea du irekia, Garazi Arrularekin batera. 'elearazi.org' du izena.

Sariketa honetara egitasmoak aurkeztu behar dira, jakina denez. saritua izan ondoren, urtebetea eman ohi zaio idazleari, lana burutu dezan. Emakume obsesibo bat izango da 'Mamuak' eleberriko pertsonaia nagusia eta kontalaria. «Bikote-harreman baten bukaera kontatuko du protagonistak. Ez da oso modu politean bukatu harreman hori. Gurasoak ere, ezkonduta daude, baina ez dute elkar maite. Jende askok du autotortura-tzeko joera, eta emakume hau ere halakoa da, horren adibide garbia da», esan zuen idazleak atzoko aurkezpenean.

Meabe inspirazio-iturri

Izenburua, berriz, Miren Agur Meaberen olerki-zati batetik hartu zuen Sarriugartek: «Honela zioen Meabek 'Bitsa eskuetan' liburuko ale batean: 'Hona hemen nire ile gorria / mamu tematien kukuleku'. Ikusi nuen iltzearen erdi-erdian jotzen ari zela».

Ez du ekintzaz eta elkarrizketaz beteriko eleberria egiteko asmorik. «Ez, izan ere nire proiektuak eska-tzen duen estiloa horixe delako, pertsonaiaren bakarrizketa da kontakizunaren ildo nagusia eta hor ezin elkarrizketa gehiegi sartu. Gainera, irakurleari soilik narratzailearen ikuspuntua helaraztea interesatzen zait, eta inguruan dabilzkion pertsonaien ahotsa sartzeak ikuspuntu bakar eta partzial hori lor-tzea zapuztuko luke», adierazi zuen.

Ondo bidez, 2014. urte hasieran kaleratuko da liburua, ohi bezala Elkar etxearen bidez. Uxue Alberdi, Igor Estankona eta Xabier Etxeberria izan dira epaimahaikideak.

Idazle gazteei bultzatzeko sortu zen Igartza Saria, orain 15 urte. Gero bide luze eta emankorra egin duten idazleak gertatu izan dira irabazle, hala nola Unai Elorriaga, Karmele Jaio, Jasone Osoro, Katixa Agirre, Uxue Alberdi, Eider Rodriguez eta Fernando Morillo.

Esan bezala, 'elearazi.org' webgunea kudeatzen du itzultzaile eta idazle honek. «Martxoaren hasieran abiatu genuen webgune hori Garazi Arrulak eta biok, eta itzulpengintzaren inguruan hausnartzea, hausnarraraztea eta eztabaidatzea da lortu nahi dugun helburua. Hutsune bat ikusten genuen. Besteak beste, euskaraz ez dauden autoreak ekartzen ditugu, eta itzulpengintza eta literaturarekin lotutako hausnarketak plazaratzen. Guretzat oso garran-tzitsua da jendearen parte hartzea, eztabaida eta elkarrizketa susta-tzea».