Dantzariek herriko kale eta auzoak girotuko dituzte gaur Hernanin

Gaur izango da Dantzari Festaren egun handia. Goizeko 11:00etan kalejiran ibiliko dira Euskal Herri osotik etorritako dantzariak. Ondoren, Hernaniko kale eta auzoetara gerturatuko da talde bakoitza dantza ekitaldia egitera (euria egingo balu, Biteri kultur etxean inzago da). Hau izango da eguneko ekitaldi nagusietako bat; bestea, 13:30etan hasiko da, Gudarien plazan. Talde guztiek elkarrekin, Ikurriñaren dantza egingo dute bertan. Azkenik, bazkari herrikoia Atsegindegi plazan eta bazkalostean, erromeria egingo dute, 18:00etan, kaleetan barrena. Bestalde, gaur ere dantza emanaldia izango da Osiñaga auzoan. Arrasateko Lore Gazteak dantza taldeak eskainiko du ekitaldia, goizeko 11:30etatik aurrera, Borda Berri etxearen aurrean.

Txikien txanda

Atzo, eguraldi zoragarria aprobetxatuz, Gipuzkoako 6 dantza taldetako dantzari txikiak izan ziren protagonista, Hernaniko Ttarla dantza taldekoak, besteak beste. Goiz eta arratsaldez girotu zuten herria euren dantza saioekin.