XXXIV. Ibilaldi Neurtua igandean, Bizardia elkartearen eskutik

Gurutzeko Bizardia elkarteko mendi taldeak, Oiartzungo XXXIV. Ibilaldi Neurtua antolatu du iganderako, Oiartzungo Udalaren laguntzarekin. Doneztebe plazan hasi, eta bost ordu inguruko ibilaldia egin ondoren, Gurutzen izango dute helmuga mendizaleek.

Irteeran izan nahi dutenek, igandean bertan eman behar dute izena, 3 euro ordainduta. Bizardiako Mendi taldeak jakinarazi duenez, mendia gustuko duten guztiek parte har dezakete. Lehenengo taldea 07:30ean aterako da Doneztebe plazatik, eta besteak minututik minutura. Aurtengoan ere Oiartzungo herria inguratuko dute mendizaleek. Elizalde auzotik abiatu eta Karrika auzoa, Artasoro iturria, Oieleku (600m), Penadegi, Sorotxo, Unaileku eta Bostbidea izeneko parajeak igaro, eta Gurutze auzoan amaituko dute.

Dagoeneko dena prest dute Bizardikoek parte hartuko duten lagunek mendi ibilaldi bikainez goza dezaten.