Bildu eta PNV akordio batera iritsi dira zaborra jasotzeko sistemaren inguruan

Hondakinen Mahaian hainbat bilera eta eztabaida izan ostean, azkenean akordio batera iritsi dira Zestoako Udaletxeko bi alderdiak (Bildu eta PNV), zaborra jaso-tzeko sistemaren inguruan. Mahai honetan herriko hainbat eragile, norbanako herritar eta Udaletxeko bi alderdiak aritu dira, eta adostu duten akordioaren arabera «sortzen ditugun hondakinak ahal den gehien murriztu, berrerabili eta birzikla-tzeko, gaur egungo sistemak dituen emaitzak (%30) hobetzeko beste sistema baten alde egingo dute, gutxienez %70eko gaikako bilketa lortzen duen sistema baten alde».

Oraindik guztiz erabakita ez dagoen arren, badirudi sistema berri honek ez dituela zintzilikailurik izango etxe aurretan, baizik eta ordu zehatz batean edukiontziak jarriko direla portal edo atari aurrean (egun horretan ateratzea tokatzen dena botatzeko), eta gero, pare bat ordu pasa ostean edo, berriro ere jaso egingo direla. Horrela, kristala eta kartoiaren edukiontzi handiak mantendu egingo dira, eta gaika atera beharko direnak zabor organikoa -3 edo 4 egun astean-, plastikoa eta errefusa izango dira.

Baserri, dendari eta ostalariak

Sistema berri hau dendari eta ostalariekin adostu beharra izango da, hauen beharrak aztertu eta beraien neurrirako bilketa egokiena egiteko. Baserri ingurutako ere sistema moldatu egingo da, elkarren artean adostuz. Horrez gain, udalak prebentzio kanpainak, auto-konposta eta konposta komunitarioa indartuko ditu.

Udaberrian zaborrak jasotzeko sistema hau martxan egotea nahi du Udalak, eta aurrez, urtarrilean hasita, «hainbat bilera antolatuko dira, kalez kale -eta beharrezkoa balitz portalez portal- herritar guztiena iritsi, zaborrak jasotzeko sistema hau ondo eta zabal azaldu eta herritarren kezkei eta galderei erantzunak emateko» dio Ruben Alberdi alkateordeak.

Akordioa

Akordio hitza bi alderdiak biziki aipatu eta goraipatu dute. «Guretzat sistema egokiena atez atekoa zen, baina herritarren artean lixkarrik ez sortzea da gure egin beharra, soluzioak ematea, eta gainera, adostasun batekin askoz emaitza hobeagoak lortuko direla garbi daukagu; beraz, bidean zerbait utzi behar izan dugun arren, herritarrei begira jarriz eta zaborrak gehiago birziklatzeko iritSi gara akordio honetara» zioen Alberdik, udalaren izenean. Iritzi berdinekoa zen udaletxean PNV-ko burua den Josetxo Mendizabal; «herria ez tentsionatzeko iritsi gara akordio honetara» zioen lehenengoz, eta «Bilduk udaletxean gehiengo osoa izan arren akordiorako prest ikusi dugu -zintzilikailurik ez jartzea onartu du, abar- eta guk ere zenbait pausu eman ditugu adostasunaren bidean, gure apustua bosgarren edukiontzia eta herri galdeketa baitziren; azkenean alde guztiak elkarlanean arituko gara, helburua komuna baita denona, ahal den gehien birziklatzea» zioen jarraian Mendizabalek.