Birziklatzeko deia egiten zaie Udaletik herritarrei

Udalak birziklatzeko guneak bildu eta egokitzeko ahalegina egin du azken hilabeteotan. Horren ondorioz, hobeto antolatuta daude orain gune horiek, eta herritarrek errazago dute birziklatzea.

Birziklatzeko guneetan era guztietako hondakinak biltzen dira: papera, ontziak, beira, organikoa. eta, hortaz, herritarrek ez dute ibili behar toki batetik bestera, hondakin bakoitza bere tokian uzteko. Erraztasunak eman arren, oraindik badaude herritar batzuk zailtasunak dituztenak beren hondakinak behar bezala birziklatzeko: batzuetan, ez dakitelako nola egin eta, bestetan, axolagabekeriagatik.

Udalaren deia

Udalak dei egin nahi die oriotar guztiei, gai hau, birziklatzearena, arretaz zaintzeko eta dagokion garrantzia emateko. Herrian gaur egun dauden bitartekoekin oso erraza da ondo birziklatzea eta ohitura batzuk aldatzea baizik ez du eskatzen.

Birziklatze-tasa %36koa da, gaur egun, eta Udala osatzen duten alderdi guztiek adostuta daukate %65 birzkilatzera iritsi nahi dutela 2015ean. Dena den, orain urruti agertzen da oraindik egun birziklatzen den %36etik. Beraz, guztion ahalegina beharko da eta horretan saiatzeko eskatzen zaie herriko familia guztiei.