Antzuola

Azpeitian lau gol sartuta eta irabazita bosgarren bukatuko du liga AKEk

Antzuola Kirol Elkarteko futbol talde nagusiak hiru puntuak ekarri zituen Azpeititik domekan Ikasberriri 1-4 irabazita. Neurketako aurreneko gola etxekoek sartu bazuten ere, bisitariek erantzuna ona eman zieten beste laurekin. Haritz Mondragon, Mikel Jauregi, Jon Baleztena eta Xabier Larrea izan ziren golegileak.

Bosgarrena da Antzuola sailkapenean. Laugarrena bost puntu aurretik du eta seigarrenari lau ateratzen dizkio. Leku horretan bukatuko da liga. Izan ere, jardunaldi bakarra falta da, datorren asteburukoa. Aretxabaleta C hartuko du Eztalan zapatu eguerdian, hamabiak eta laurdenetan.

Lau partida irabazi eta bat galdu dituzte AKEko asteburu honetan. Jubenilek hasiera ona eman zioten Urkiren kontrakoari Eibarko Unben 0-2 aurrea hartuz (Aimar Pozo eta Aimar Moreno) baina hiru gol jaso zituzten.

Kadeteentzat alderantziz geratu ziren gauzak Lazkaon Koparen barruan: galtzen hasi, 1-0 zein 2-1, eta azkenean 2-3 nagusitu ziren. Julen Garitanok, Ibai Valorrek eta Ander Etxanizek sartu zituzten golak.

Mutil infantilek Mutriku 4-1 hartu zuten mendean txapeldunen fasean, Eñaut San Sebastianek eta Aitor Madinak bina gol egin zituztelarik. Neskek, berriz, hiru puntu bereganatu zituzten Elgoibartik 0-2 irabazita.