Aretxabaleta

Institutua eta frontoiaren proiektuen «plangintza ezak» kezkatzen du EAJ

Inbertsioei dagokienean, Aretxabaletako EAJ bat dator hainbat puntutan EH Bilduko udal gobernuak proposatutako aurrekontuarekin. «Jarraipena ematen dio aurreko legegintzalditik datozen proiektuei, besteak beste Mojetako gunearen eta Andra Mari auzuneko urbanizazioei eta kirol etxeko berdeguneko ekipamenduari». Alde honetatik «positiboki» baloratu dute jeltzaleek EH Bilduren aurrekontu proiektua.

Zaintza ekosistemaren inguruko proiektuari ematen zaion jarraipena ere «zentzu berdinean» baloratzen dutela adierazi dute alderdi jeltzaleko zinegotziek.

Institutu berria eta Iturrigorrri frontoiaren eraberritzea ere «hauteskunde programan proposatu genituen ekimenak dira», eta «koherentziaz» bat egiten dute jeltzaleek instituturako beharrezko lurrak erosi eta frontoiaren aurreproiektua idazteko ekimenetan.

Aldiz «kezka sortzen» die jeltzaleei «bi proiektu hauek eta legealdiko gainontzeko proiektu estrategikoen plangintza ezak».

Aurrekontua osotasunean baloratzeko orduan «beharrezkoa da legegintzaldi osoko argazkia izatea eta ez da nahikoa balizko parte hartze prozesu baten menpe uztea», adierazi dute EAJko zinegotziek.

Horrez gain, jeltzaleek beste hainbat ekarpen egin dizkiote aurrekontu proiektuari. Guztira, sei.

Mojetako gunea eta Iturrizar-Txarapea igogailua lotuko dituen proiektua dagokionean, Ur-Agentziaren baldintzetara egokitzeko partida espezifikoa zabaldu dadila eskatu dute. «Lehentasunezko ikusten dugu oinezko ibilbide honi jarraipena ematea».

Bigarrenik, Lausitako hornidura eta saneamendu sarearen inguruan «inolako aipamenik» ez dagoela nabarmendu du EAJk. Jeltzaleek «beharrezkoa» ikusten dute legealdian proiektu hau aurrera eramatea eta horretarako «2024an eraikitze proiektua idazteko partida bat» proposatzen dute.

Autokarabanen ur zikinak usteko gunea eraikitzeko partida aurreikusten da aurrekontuan. Jeltzaleen iritziz «ez da inondik inora udalak eman beharreko azpiegitura bat», eta partida hau ezabatzea planteatzen dute. «Ibilgailu horien jabeei dagokie behar horiek asetzea», argudiatu dute.

Herri sarreretan dauden oinezko pasabideak argiztatzeko diru partida zabaltzea eskatu du EAJk, «oinezkoen bide segurtasuna handitzeko». Garbitasunari buruzko ardura agertu dute. Autobus geltokien mantentzerako eta orokorrean herriko paretan txukun eta garbi izateko partidak igotzea eskatu du EAJk.

Bide publikoen mantentzerako partida 40.000 eurotan igotzea planteatu dute. «Urtero 100.000 euroko partida» mantentzeko beharra ikusten dutela adieraziz.

Aurrekontuan aurreikusi den gune estaliari (200.000 euro) ere erreparatu diote jeltzaleek azpimarratuz «gaur egun ez dagoela definituta kokagune zehatzik eta ez dagoela aurreproiekturik». Ondorioz, partida hau 2025era atzeratzea proposatzen dute eta 2024a baliatu planteamendu hau garatzeko. EAJren esanetan udal gobernuari «jarrera eraikitzailean» planteatutako proposamenak dira hauek, «hauteskunde garaian esandakoarekin koherentziaz» jokatuz.