Aretxabaleta

Kurtzebarri Eskolak lanpostua sortu du jangelan desgaitasuna duen ikasle ohi batentzat

Programak, hiru fase ditu: formakuntza, praktikak eta lan egonkorra eta, proiektuan parte hartzen dutenek, hiru fase hauek igaro behar dituzte lan egonkor batera heltzeko.

Kurtzebarri Eskolak Pauso Berriak proiektuan bere hazitxoa jartzeko «aukera eta ohorea» izan du. Eskolako ikasle ohia den Irati Letek lehengo fasea bete ondoren, iazko ikasturtean, Kurtzebarri eskolarekin praktikaldiko fasea egin zuen. Esperientzia «oso polita eta aberasgarria» izan zen; «elkarrekin gozatu eta elkarrengandik gauza asko ikasi baikenituen praktikaldi sasoi haretan», adierazi dute eskolatik.

Baina Irati Leteren esperientzia ez zen praktikaldi soilean gelditu. Proiektuari jarraituz, oraingoan, esan bezala, Kurtzebarri Eskolak lanpostua bat sortu du jangelan Iratirentzat. «Harrotasunez esan dezakegu, Eusko Jaurlaritza, Atzegik eta Gureakek, Pauso Berriak proiektuari esker eginiko elkarlan eta ahaleginetik, gutxienez, 3 urtetarako lanpostu berri bat sortu dugula Kurtzebarri Eskolak Iratirentzat».

Lanpostu sorrera honekin pertsona guztien inklusioan sakondu nahi izan du Kurtzebarrik. Era honetan, egitasmoak berak eta Iratiren ezaugarriekin lankide bat izateak, «gure hezkuntza proiektua aberasteaz gain, pertsonalki ere era positiboan eragiten digu».

Iratirekin egin duten urtebeteko bide honetan, elkarrekin soinez-soin lan egiteko aukera izan dute; «ezberdintasunak berdintasun bihurtuz, ezberdin berdinak garela ikusiz, elkarlanean arituz eta elkarrengandik makina bat gauza ikas ditzakegula jabetuz».

Hiru urterako lanpostua bada ere, Kurtzebarri Eskolak etorkizunean Iratirekin bidea egiten jarraitu nahi du, dagoeneko, beraien «lankide eta lagun baita eta gure bidaide izaten jarrai dezan desio dugu».