Aretxabaleta

Musika, antzerkia eta literatura, ekitaldiz beterik datorren apirileko agendan

Aste Santuko etenaldiaren ostean, berriro ere hi-tzorduz beterik datokigu kirol eta kultur agenda Aretxabaletara eta apiril osoan izango da zer egin eta zer ikusirik herrian. Musika, antzerkia, tailerrak... izango dira datozen asteetan, ohi bezala adin eta gustu ezberdinak asetzeko xedeaz antolatu den egitarauaren baitan.

Hilabeteko lehen hitzordua oso berezia izango da, duela urtebete istripuz hil zen Ekain Andres gogoratzeko balioko baitu. Izan ere, haren omenezko jaialdia antolatu dute lagunek larunbat honetarako. Arkultzeko kantxan izango da, 18:00etatik aurrera, eta bertan, era batera edo bestera Ekainen hurbilekoak ziren taldeek joko dute: Txerrikumeak, The Clayton, Kaparrak, Etxepe eta DMT (Denso, Mutiko, Tatta). Sarrera doan izango da.

Antzerkiak bi hitzordu utzi behar zizkigun hilabete honetan baina apirilaren 13rako aurreikusita zegoen 'Munduari itzulia 80 egunetan' lana bertan behera geratu ostean, bakarra izango da. Apirilaren 12an, ostiralarekin, Txalo Produkzioak konpainiak 'Baginaren bakarrizketak' lan ezaguna ekarriko du Arkupe kultur etxera. Adin, arraza, maila kultural eta sozial ezberdinetako 200 emakumeei egindako elkarrizketen emaitza da antzezlana, Eve Ensler-ek idatzia. Umorea, samurtasuna eta, tarteka, izua adieraziz, hiru aktorek emango diete ahotsa emakumeei, poesia, probokazioa eta barrearen bidez. Begoña Bilbaoren zuzendaritzapean, Ainhoa Etxebarria, Itziar Urretabizkaia eta Intza Alkain dira oholtzara igoko diren aktoreak.

Musikari dagokionez, larunbat honetako kontzertuaz gain, beste bi proposamen interesgarrik osatzen dute apirialeko egitaraua. Batetik, apirilaren 14an, igandearekin, Paul San Martin eta Fran Serranok osatutako bikotea entzuteko aukera izango da Arkupe Kultur Etxean. Jazz, blues eta Boogie woogie doinuak eskainiko dituzte San Martinek pianoan eta fran Serranok kontrabaxuarekin.

Eta, bestetik, hilabeteko egitaraua ixteko, apirilaren 27an, Korrontzi talde bizkaitarrak 20. urteurreneko biraren baitan geldialdia egingo du Arkupe kultur etxean. Urrian 20 urte beteko dira Galdames Folk jaialdian lehen aldiz talde gisa taula gainera igo zirenetik eta hori behar den bezala ospatzeko bira zabala eskaintzen ari dira.

Ohi bezala, literatura solasaldia ere izango da hilabete honetan. Apirilaren 11n izango da eta oraingo honetan Joan Mari Irigoien (Altza, 1948) idazlearen 'Babilonia' eleberria izango dute hizpide, Mikel Antzak gidatuko duen saioan.

Eta apirilaren 24an, berriz, ipuin kontaketa saioa udal liburutegiko Txiki Txokoan. Miren Larrea ipuin kontalariak Katalinen bila izeneko saioa eskainiko die 5 eta 8 urte bitarteko haurrei.

Ez da hau gaztetxoeentzat prestaturiko eskaintza bakarra. Izan ere, apirileko bi larunbatetan, 13an eta 20an, buruhandiak egiten ikasteko tailerra antolatu dute Lehen Hezkuntzako umeak dituzten familientzat. Arkupe kultur etxean izango da, goizez, eta izen-ematea zabalik dago, hilaren 10era bitartean.

Egitaraua osatzeko, apirilaren 16an, 'Udalatx, ura eta atxa' dokumentalaren proiekzioa izango da Arkupen, Besaide Mendizale Film Festival-ek aurkeztua.