2022an baino % 26,7 bisita gehiago izan ditu Igartubeiti Baserri Museoak

Pandemiaren aurretiko bisitari kopuruak berreskuratuz eta hobetuz itxi du 2023a Ezkio-Itsason den Igartubeiti Baserri Museoak. Zehazki, 2022an baino % 26,7 bisita gehiago izan ditu, hein batean lehen lauhilekoan aurreko urtearekin alderatutako % 41eko gorakadari esker, Barne Begiradak proiektuaren programazioaren ondorioz, Sagardoaren Asteko bisitarien datuekin batera.

Barne Begiradak ekimena 'Sorkuntza garaikidea landatartasunetik' proiektuarekin hasi zen eta 240 parte-hartzaile eta 30 eragile sortzailek hartu dute parte. Kulturak landa ingurunean aldaketa eta eraldaketa sozialeko dinamikak bultzatzeko duen ahalmenean sakontzea du helburu egitasmoak, «mugarri» Igartubeitirentzat, bere inguruko eragile, pertsona eta proiektuekin elkarlanean aritzeko moduak indartu baititu.

Datu «oso positiboen» beste arrazoietako bat udako hilabeteetan izandako atzerriko bisitariak izan dira, 2022ko datuekin alderatuta bikoitzak izan baitira. Era berean, Estatutik etorritakoak % 3 gehitu dira; horien artean, Kataluniatik, Madrildik eta Valentziatik etorritakoak nabarmentzen dira. Hein batean Euskadi Gastronomikak antolatutako 'Mundua lau zaporetan margotuta' erakusketagatik.

Azkenik, 'SagarTxotx!' jarduera nabarmendu dute, dolarearen sekretuak ezagutzea eta sagar zukua modu tradizionalean egitea bilatzen duena. Asteazkenero eskaintzen da eta bertako zein atzerriko jendeak gehien eskatu duen jardueretako bat izan da.

2024rako programazioari dagokionez, Igartubeiti Baserri Museoak jakintza tradizionalak modu praktikoan biziberritzeko programazioa eskaintzen jarraituko du.

Besteak beste, helduentzako tailerren eta jardueren «Eskutik eskura» programa nabarmentzen da. Programa horren helburua jakintza tradizionalekin erlazionatutako gaiei buruz hausnartzea, jasangarritasunari buruzko gaietan kontzientziatzea eta eskuekin sortzeko motibatzea da.

Ildo beretik, ahozko memoriaren eta hainbat tailerren bidez, Igartubeitik «Ogibideak, lehen eta orain» proiektua burutuko du, Ezkio-Itsasoko eskolako ikasleekin, eta horrela, 2024an lurraldeko tokiko komunitatearen dinamizatzaile izaten jarraituko du.