Ezkio-Itsaso

Ezkio Eraikizentzat izan dira Udaleko zazpi zinegotziak

Udalean ez da aldaketarik izan eta Ezkio Eraikiz plataformak zazpi zinegotziak lortu ditu berriro. Enrique Jose Ramos buru duen PSE-EEk ez du ordezkaririk lortu.

Horrela, eta 311 botorekin, Joseba Telleriak Ezkioko alkate izaten jarraituko du lau urtez. Parte-hartzea nabarmen igo da aurtengoan. 348 pertsona joan dira bozkatzera, 2019an baino %15,64 gehiago. Orduan 278 pertsonak eman zuten botoa. 348 lagun horietatik, 311k Ezkio Eraikiz aukeratu dute, hautesleen % 90,14k. Guztira, sei puntuko gorakada izan da boto guztietan, eta, ondorioz, 82 lagunek hautatu dute Ezkio Eraikiz plataforma.

PSE-EE, aldiz, zinegotzi bat lortzetik urrutirago geratu da, azken udal hauteskundeekin alderatuta hamar boto gutxiago lortu baititu. Lau urtetan 28 boto-paper izatetik 18 izatera pasatu da da, hau da, % 5,12ko jaitsiera izan da boto guztietan.

Joan den igandeko abstentzioa 129 lagunekoa izan da, hautestontzietara hurbildu zirenetatik 16k boto zuria eman zuten eta 3k boto baliogabea.

Emaitza honekin, udal berria ondorengo zinegotziek osatuko dute: Joseba Telleria Zubeldia, Itziar Etxezarreta Arakistain, Gorka Sasieta Barrenetxea, Maria Isabel Flores Caballero, Iñaki Alberdi Aramburu, Asier Alberdi Albistur eta Ainhoa Albizu Uriarte. Zazpi ek ekainaren 17an hasiko dute udalbatza berria, eta orduan hasiko da legegintzaldi berria.

Gipuzkoako Foru Aldundirako ordezkarien hautaketari buruzko datuei dagokienez, 341 pertsonak eman zuten botoa hautestontzietan, baina udal hauteskundeetan ez bezala, % 3,05 egin du behera parte-hartzeak 2019koarekin alderatuta. Berriz ere EH Bildu izan zen zerrenda hautatuena, 178 botorekin. Boto-paperen kopurua lau aldiz jaitsi bada ere, botoen ehunekoa % 1,5 hobetu da, hautesleen erdiak baino gehiagok aber tzale koalizioaren plantxaren alde egin baitu.

Emaitza onenak lortu dituen bigarren alderdia EAJ izan da, baina 25 boto-emaile galdu ditu 2019ko foru hauteskundeekin alderatuta, eta % 5 gutxiago. Elkarrekin Podemos izan da hirugarren indar bozkatuena, duela lau urte baino boto bat irabazita, 19 hain zuzen ere. PSE-EEk hiru boto gehiago izan ditu, 9 izatetik 12 izatera igaro da; PPk, ordea, boto bat galdu du, bakarra eskuratuta. Foru hauteskunde hauetan boto zuriak 12 izan dira – 2019an baino hamar gehiago –, eta baliogabeak 3.