Gari Arambarri azkoitiarra hautatu dute Ars Natura artisten egoitzarako

Gari Arambarri azkoitiarra izango da Igartubeiti Baserri Museoak abiatuta Zerainen gauzatuko den Ars Naturan egoitza artistikoan parte hartuko duen artista. Halaxe aukeratu du egitasmoaren epaimahaiak bere prestakuntza artistiko «oso interesgarria eta queer eta gai feministetan egindako ibilbidea» baloratuz, «baita hainbat hedabidetan (eskultura, instalazioa, bideo-sorkuntza eta sorkuntza literarioa) istorioak sortzeko duen gaitasuna ere». Oro har proiektura aurkeztutako lanen kalitatea azpimarratu du epaimahaiak.

Gipuzkoako landa-ingurunean garatzen den Barne Begiradak proiektuaren barruan gauzatuko da Ars Naturan egoitza otsailaren 13tik martxoaren 19ra bitartean. Lurraldean bizitzeko modu berrien inguruko hausnarketak planteatzea da egitasmoaren xedea, beti ere landako eta hiriko naturak kontzeptu-esparru gisa hartuta.

Gari Arambarri Arregui (Azkoitia, 1997) Artearen Historian graduatua da (2019) eta Arte garaikide teknologiko eta performatiboan masterra (2020) du, biak UPV/EHUn. Egoitzak egin ditu BilbaoArten, Tabakaleran, LABen Elkargunean eta Dinamoan. Izan ere, Bilbon bizi eta lan egiten du. 2022an bakarkako lehen erakusketa ere egin zuen Koldo Mitxelena kulturunean, JAIren Tabakalerako ikasketa-programan parte hartu zuen eta Eusko Jaurlaritzaren laguntza jaso zuen arte plastikoak ekoizteko.

«Egoitza honekiko interesa duela lau urte hasi eta arrazoi akademikoengatik alde batera utzi nuen ikerketa-gai bati berriro ekitean sortzen da –adierazi du Arambarrik–. Pertsonalki ukitzen nauen gaia da, ahozko memoriari dagokionez baliotsua dela uste dut, tokiko komunitatearekiko loturari dagokionez, eta leku bereko belaunaldi guztiei dei egiten die, hain zuzen ere, denboran zehar-izaera duelako».

Egoitza artistikoan zehar, lehen topaketa bat izango da Zerain udalerriarekin, eta bertan artistak bere proiektua azalduko du. Gainera, Zeraingo publikoari zuzendutako tailer bat, egindako proiektuaren pic-nic performance bat eta egoitzan garatutako sormen prozesuaren aurkezpen bat ere egingo da 'Ber (topaketak). Artea, lurraldea eta landa-eremuak' izeneko topaketan, martxoan Igartubeitin.

Igartubeiti Baserri Museoak abian jartzen duen programa Next Generation funtsen bidez finantzatzen da. Egoitza artistikoarekin batera eta programaren barruan, tailer esperimentalen ziklo bat, 'Ber (topaketak). Artea, lurraldea eta landaeremuak' izeneko topaketa, eta programa osoa jasoko duen argitalpen bat ere gauzatuko dira.

Barne Begiradak Igartubeiti Baserri Museoaren lan ildo bat da, 2013an hasitako ondare eta arte arloaren artean. Gizarte berrikuntzaren eta praktika artistiko garaikideen bidez landa ingurunean bizitzeko moduak ikertzea planteatzen du. 2013tik, Igartubeitik lan-ildo hori garatu du, besteak beste, urteko kultur programazioan ildo artistiko bat txertatuz, egoitza artistikoak sortuz edo sorkuntza garaikidea eginez. Lan-eremu horri jarraipena eman nahi dio Igartubeitik bere ibilbidean zehar. 2023an bultzada berri bat lortu du, Next Generation funtsen bidez, Berreskuratze, Eraldaketa eta Erresilientzia Planeko hiriguneetan kultura-eskaintza zabaltzeko eta dibertsifikatzeko laguntzei esker. Proiektuari buruzko informazio gehiago www.igartubeitibaserria.eus webgunean.