Haristizabalen jardunaldi bikaina igaro zuten atzo udalekuetako nagusienek

Aurrera doaz Ezkioko udaleku irekiak, aurtengo honetan guztira herriko eta inguruko 53 haur eta gaztetxo parte hartzen ari direlarik. Egunero, astelehenetik ostiralera goizez ekintza ugari izaten dituzte haurrek eta atzo lehenengoz Haristizabal baserrira (Itsaso) gerturatu zen nagusien taldea, bertan jardunaldi bikaina igaro zutelarik.

Aurtengo udalekuetako haur eta gazteen kopurua handia denez talde desberdinetan banatu dira hauek eta nagusien lehenengoa atzo goizean izan zen Haristizabal baserrian, bertan egiten dituzten gaileta gozoen prozesua ezagutu eta praktikan jartzeko aukera izan zutelarik. Bertako eta kalitatezko produktuen erabileraren garrantzia zuzenean ezagutzeko aukera izan zuten gazteek atzo. Labeak behar duen tenperatura ezagutu, gailetak egiteko behar diren osagaiak zerrendatu, neurtu... eskuak garbitu eta lanean jarri ziren hauek Itxaso Olabideren gidaritzapean. Pausoz pauso osagaiak guztien artean nahastu zituzten eta behin masa osaturik, hau zabaldu eta gailetei forma eman zieten, azkenik, labera sartuz.

Beste bi taldek ere bisitatuko dute oraindik Haristizabal, baina egun berezi honetaz aparte, beste asko izango dira aurrerantzean eramango diren ekintzak: piszina, Ezkiora txangoa, Mozorro eguna, Pott kermika, Zikinen eguna...

Hilaren 29ra arte asko dira burutuko dituzten ekintzak, egun horretan merendola batekin amaituko dutelarik.