Pilotari txikien festa haundia Ezkion

Ezkioko pilota eskolak bere ikasle txiki eta gaztetxoen erakustaldia antolatu du Gabonetarako. Abenduaren 31n izango da, goizeko 11:00etatik aurrera, Ezkioko frontoian. Honen egiturari aipamena eginez, 'Ezkioko kaiola' deitu diote jaialdiari.

Pilotako belaunaldi berrien festa politaz gozatzeko aukera egongo da egun horretan. Txikienek 5 urte izango dituzte eta haundienek 12 urte. «Edariak eta pintxoak eskainiko ditugu debalde bertaratzen direnentzat», iragartzen dute pilota eskolatik.

Erakustaldia hiru ataletan banatuko da. «Alde batetik, eskolako txikienek jokuak egingo dituzte, bestetik, alebinek mano mano txapelketa jokatuko dute eta azkenik, infantilek erakustaldia eskainiko dute», azaltzen dute.

Eguna heldu bitartean, pilota entrenamenduei heltzen jarraituko diete, ostiraletan, 17:00etatik 20:00etara, Ezkioko frontoian. Txikienek Joxe Mari Gabilondo eta Julen Mantecon maixuen gidaritzapean aritzen dira, alebin eta infantilak berriz, Alex eta Mikel Fernandezekin trebatzen dira.

Gabonak pasa ostean, beste bi ekimen garrantzitsu jarriko dituzte abian. Otsailean, Euskal Herriko toki anitzetatik etorritako parte-hartzaileak biltzen dituen 'pilota goxua' txapelketa hasiko da ez federatuentzat. Eskualdeko pilota txapelketa ere martxan jarriko dute, bere finala maiatzeko festetan ospatuz.