Zabalik Ars Natura egoitza artistikorako proiektuak aurkezteko epea

Igartubeiti Baserri Museoak Ars Natura erresidentzia antolatzen du Barne Begiradak proiektuaren barruan. Proiektu horrek, berrikuntza sozialaren eta praktika artistiko garaikideen bidez, landa-ingurunean bizitzeko moduak aztertzea planteatzen du. Bertan parte hartzeko proiektuak aurkezteko epea iada zabaldu da, eta urtarrilaren 30era arte bidaltzeko aukera izango dute adin nagusiko sortzaileek edo Gipuzkoan bizi diren artisten kolektiboek.

Ars Natura egoitza Zerainen izango da 2023ko otsailean eta martxoan. Aurkezten diren proiektuek lurraldean bizitzeko modu berrien inguruko hausnarketak proposatu beharko dituzte, landako eta hiriko izaerak kontzeptu-esparru gisa abiapuntutzat hartuta. Lurraldearen, kulturaren eta gizarte-aldaketaren arteko loturatik abiatuta, proiektuak zuzenean garatuko dira Zeraingo udalerriko tokiko komunitateekin lankidetzan, bertako biztanleen interes, motibazio eta beharren ezagutzatik abiatuta. Egoitza hau garatzen den lekuan eragin zuzena izan nahi du.

Ars Natura erresidentziak arte bisualak, ikus-entzunezkoak, instalazioa, Land Art, argazkilaritza, soinua, antropologia, ikerketa, eskultura, performancea eta artistaren eta lurraldearen arteko elkarrizketa, ingurunearen espezifikotasunaren eta testuinguruaren barruan eta paisaiaren eraldaketaren ideiarekin lotuta dagoen adierazpen artistiko edo lan-ildo guztiak biltzen dituzten proposamenak onartuko ditu.

Deialdia Gipuzkoan bizi diren adin nagusiko sortzaileentzat edo artista taldeentzat da. Egiten diren proposamenek ikerketa eta ekoizpen-oinarri bat izan beharko dute, artistaren, lurraldearen eta paisaiaren arteko elkarrizketari lotuta (kasu honetan, bizilekua garatzen den ingurunea).

Lanak aurkezteko epea 2023ko urtarrilaren 30eko 17:00ak arte egongo da zabalik, eta posta elektronikoz egingo da. Balorazio Batzordearen azken erabakia 2023ko otsailaren 6tik aurrera jakinaraziko da.

Interesatuek deialdiari buruzko informazio gehiago aurki dezakete Igartubeiti baserri museoaren webgunean eskuragarri dauden oinarrietan.

Ars Natura erresidentzia artistikoa Gipuzkoako Foru Aldundiaren Igartubeiti Baserri Museoak sustatzen du eta 'Barne Begiradak. Sorkuntza Garaikidea Landatartasunetik' museoaren proiektuaren barruan kokatzen da. Next Generation funtsen bidez, Berreskuratze, Eraldaketa eta Erresilientzia Planeko hiri-eremuetatik kanpoko kultura-eskaintza handitzeko eta dibertsifikatzeko laguntzek finantzatzen dute.

Berrikuntza sozialaren eta praktika artistiko garaikideen bidez, landa-ingurunean bizitzeko moduak ikertzea proposatzen du 'Barne Begiradak. Sorkuntza garaikidea landatartasunetik'. Igartubeiti Baserri Museoak bultzatutako proiektua da, museoak urteak daramatzan lan-ildoaren barruan, artezaletasunaren eta ondarearen arteko hibridazioa aztertzen duena.