Urretxu

Goierri Desvill taldearen ahaleginek ez zuten saririk izan markagailuan

Denboraldiko azken norgehiagoka gazi-gozoa izan zen Goierri Desvill Publicidad saskibaloi taldearentzat. Tolosan jokatu zuen larunbat goizean, Take Urdin taldearen aurka. «Jokalariek gogotsu heldu zioten lehiari eta 0-4 partziala lortu zuten lehen bi minutuetan, baina ondoren egindako hutsegite ugariek markagailuan eragina izan zuten eta lehen laurdena 12-8 amaitu zen Tolosakoen alde», azaltzen dute.

«Bigarren laurdena ere ez zuten bide onetik hasi eta lehen 8 minutuetan saskiratze bakarra lortu zuten, baina markagailua 23-10 jarri zenean gureak esnatu egin ziren eta beraien benetako maila erakutsi zuten, bigarren laurdena 28-15 emaitzarekin amaituz», nabarmentzen dute.

«Goierrikoek ez zuten burua makurtu eta hirugarren laurdenean, 5 minutuetan 3 puntuetara murriztu zuten Takerekin markagailuan zuten aldea, 28-25 emaitza lortuz. Partida parekatu egin zen eta garaipena gertuago ikusten hasi ziren gure jokalariek, baina Tolosakoek aldaketak egin zituzten eta beraien defentsa gogortuz, markagailuan aldea lortu zuten, hirugarren laurdena 42-33 bukatuz», gogora ekartzen dute Goierrikoek.

«Gogor jarraitu zuten lanean gure jokalariek azken laurdenenean, baina ez zuten lortu aldea murriztea eta 57-42 emaitzarekin galdu zuten denboraldiko azken norgehiagoka, dena eman arren» adierazten dute.