Urretxu

Uztaila hilabete oparoa izaten ari da Zatikako neskentzat

Eguneko lehenengo lasterketan Intza Navarro hamabosgarren sailkatu zen, honekin batera, Kopako sailkapen nagusian hamargarren postua eskuratu zuen. Eguzkiñe Romaratezabalak berrogeita hamaikagarren postua lortu zuen, «bere lehen Kopa izanga lan polita eginez», nabarmentzen dute. «Kadete mailan, Olatz Romaratezabala izan genuen, bere lehen denboraldi honetan bide ederra egiten ari da lasterketetan eta kasu honetan bigarren taldetxo batean heldu zen helmugara», azaltzen dute. «Lasterketa nagusian, bederatzi txirrindulariekin aurkeztu zen gure taldea. Lan bikaina egin ondoren, azken kilometroetan talde nagusian zazpi ordezkari genituen eta gure neskek saiakera desberdinak burutu zituzten ihesaldia egiteko. Hamar kilometroen faltan, Oneka Sanchezek tropelari aurre hartu eta segundu batzuen abantaila lortu zuen. Atzetik berriz, tropel nagusian, Eneicat taldeko kideak lanean jarri eta Onekaren ihesaldiari amaiera eman zioten sprinterako antolatzen ziren bitartean. Helmugan Valentina Basilico, Leongo Eneicat taldeko italiarra, izan zen lehena. Gure taldeko Naya Mangas sub23 mailan hirugarren sailkatu zen, lasterketa orokorrean bostgarren postua eskuratu zuen eta Kopako sailkapen nagusian hamairugarren postua lortu zuen. Olatz Marquet hamazazpigarrena izan zen eta Nahia Imaz hemeretzigarrena sailkapen nagusian. Lan onaren emaitza», balioan jartzen dute.

Asturiasen ere izan dira hilabete honetan, Pola de Sieron ospatutako lasterketan sub23 eta elite mailako txirrindulariek parte hartu zuten. Lur Zufiria bigarrena izan zen, Naya Mangas bosgarrena eta Nahia Imaz hamargarrena. «Lan horri esker Zatika bigarrena izan zen taldekako sailkapenean», goraipatzen dute. «Hilabete oparoa izaten ari da gure txirrindularientzat», nabarmentzen dute.