Debako Gaztelekuak ekitaldiz beteriko egitarau berezia antolatu du abendurako

Debako Gaztelekuak ekitaldiz beteriko egitarau berezia antolatu du abendurako, beti ere, herri gazteen sormena, parte-hartzea eta harremantzea sustatzeko.

Abenduko egitarauak sukaldaritza tailerrak, kirol ekintzak (ping-pong, kriketa, dardoak eta gaztekirola) eta mural baten sorkuntza jasotzen ditu, besteak beste. Era berean, sexu hezkuntzako saioak eta Txuri Urdin izotz-pista eta Bilboko Gabon Parkera irteerak ere antolatuko dira. Jarduera ia guztiak doakoak dira (irteerak izan ezik) eta 12-17 urte bitarteko gazteei zuzenduta daude.

Irteerei dagokionez, informazio eta baimen orriak datorren astetik aurrera izango dira eskuragarri Gaztelekuan bertan eta Mendata ikastetxean ere banatuko dira. Hauetarako izen-ematea abenduaren 15ean amaituko da.

Gabonetako oporraldiari begira, Gaztelekuak ordutegia luzatuko du. Abenduaren 23tik urtarrilaren 5era, astelehenetik ostegunera 17:00etatik 20:00etara egongo da zabalik, eta ostiraletik igandera 17:00etatik 20:30era. Hala ere, abenduaren 24, 25 eta 31n, baita urtarrilaren 1 eta 4an ere, itxita egongo da.

Edonola ere, Debako Gaztelekuak datorren hilabeterako prestatu dituen jarduera nabarmenenak ondorengoak dira:

• Sukaldaritza tailerrak: abenduaren 5, 12 eta 19an.

• Kirol ekintzak: Kriketa Bergaran abenduaren 7an, ping-pong abenduaren 8an, dardo jokoa abenduaren 15ean, gaztekirola abenduaren 10 eta 17an, jumpyard abenduaren 27an eta gaztekirola (futbola) urtarrilaren 3an Elgoibarren.

• Irteerak: Txuri Urdin izotz-pista abenduaren 23an eta Bilboko Gabon Parkera abenduaren 30ean.

• Beste jarduera batzuk: Euskaraoke, bingo, muralaren sorkuntza, pintxo txapelketa, sexu hezkuntzako saioak…

Informazio gehiago nahi duenak 943 192 762 telefono zenbakira dei egin edo debakogaztelekua2@gmail.com helbidera idatz dezake.