Deba

Euskara eta euskal kultura protagonista izango dira bihar ospatuko den Euskal Jaian

Biharko Euskal Jaiaren egunari dagokionez, egitaraua goizeko 10:30ean jarriko da abian Plaza zaharrean, XII. Marmitako lehiaketaren hasierarekin (euria egingo balu, Estalitako Pasealekuan).

Horren ondoren (11:00etatik aurrera) herriko txistularien kalejira egongo da; 11:30ean Zubietako joaldunak aterako dira kalejiran eta ordu erdi beranduago Gure Kai dantzari taldeko kideak hasiko dira herrigunean dantzan, Debako Musika Eskolako dantzariekin batera.

Goizeko ekintzak borobiltzeko herriko trikitilariek euskal musika eta doinuz beteko dituzte kaleak, 13:30etik aurrera.

Euskal Jaiko unerik bereziena 15:00etatik aurrera biziko da Aldats frontoian.

Izan ere, ordu horretan hasiko da pilotalekuan urtero arrakastatsua izaten den herri bazkaria (aurtengorako 600 lagunentzako lekua egokituko da).

Beti bezala, trikitilariek bazkalostea girotuko dute eta, era berean, XII. Marmitako lehiaketaren sari banaketa bazkari herrikoiaren ostean egingo da.

Edonola ere, larunbat honetarako prestatutako festa ez da hortan amaituko; arratsaldean eta gauean ere zerekin gozatu egongo da Deban. Hala, 18:.00etan buruhandiekin hitzordua egongo da herrigunean eta 19:00etatik aurrera Que toque el de alao txarangaren kalejira hasiko da.

Aurtengo Euskal Jaia borobiltzeko Sukar taldearekin erromeria egongo da Foruen plazan, 23:30ean hasita.

Debako Udaleko Kultura eta Euskara batzordeak herritarrak animatu nahi ditu «euskal ohitura eta tradizioak ospatzeko egun berezi honetan baserritarrez jantzita kalera irtetzera».