Deba

San Nikolas festetako Bikoteen Eguna ospatuko dute larunbat honetan zehar Lasturren

Lasturko bizilagunek San Nikolas jaietako Bikoteen Eguna ospatuko dute gaur, egun osoan zehar.

Larunbateko jardunaldia Jare eta Elaia Izagirre trikitilariek alaituko dute eta eguneko egitarauari hasiera emateko bikoteen arteko pilota partidak eta bolo txapelketa egongo dira (11:00etan). Ondoren bazkaria izango da tabernan eta arratsaldean bikoteen arteko jolasak (17:30ean), zezenak eta Andutz dantza taldearen emanaldia. Azkenik, kantu afaria eta Manex Unanue eta Enaitz Zabale trikitilariekin erromeria izango dira gaur. Aurtengo San Nikolas festak borobiltzeko Intxorpe Eguna ospatuko dute bihar Lasturren. Hasteko meza nagusia egongo da (09:30ean) eta hortik aurrera hamaiketakoa, eskuz binakako pilota txapelketaren finala, bolo-txapelketa, herri kirolak, pailazoak, auzoko gazteen aurreskua edota zezenak izango dira.