Elgoibar

Udal ordezkariak eta langileak, Euskaraldiarekin bat

Elgoibarko Udaleko ordezkariek zein langileek parte hartuko dute «euskara ulertzen dutenen hizkuntza ohiturak aldatzeko helburuarekin» maiatzaren 15etik 25era bitartean Euskal Herri osoan egingo den Euskaraldia ariketa sozialaren IV. edizioan. Aurtengo Euskaraldia 'Elkar mugituz egingo dugu!' lelopean burutuko da eta Udaleko langile zein ordezkari instituzionalek argazkiak atera dituzte «ingurukoak animatzeko eta gure konpromisoa erakustera emateko». Udalak herritar guztiak animatu nahi ditu ariketa sozial honetan parte hartzera, betiere, «euskaraz gehiago, gehiagorekin eta gehiagotan egiteko».