Mendaro

Bihar herriko bi sagardo eta eskualdeko lau gazta dastatu ahalko dira Gazta Azokan

Mendaroarrek eta herrira gerturatzen diren guztiek Gazta Azokaren edizio berri batekin disfrutatzeko aukera izango dute bihar, 11:00etatik 14:00etara bitartean, Mendaroko Enparantza Nagusian.

Aurtengoan eskualdean ekoiztutako lau gazta eta Mendaroko bi baserrietako sagardoa dastatu ahalko da.

Udaletik jakinarazi dutenez, 2023ko Gazta Azokan Elgoibarko Mausitxa eta Mutrikuko Goienetxe baserrietako ardi gaztak, Soraluzeko Egotza baserriko ahuntz gazta eta Mallabiako Axeleku baserriko behi gazta izango dira herritarren eskura.

Era berean, Mendaroko Etarte eta Ospas baserrietako sagardoa dastatzeko parada izango da.

Udalak herritarrak animatu nahi ditu azokan parte hartzera.