Mendaro

Euskarazko zortzi film labur ikusi ahalko dira gaur, doan, San Agustin antzokian

Udalak antolatuta, Laburbira egitasmoaren XXI. zirkuitu ibiltaria ailegatuko da gaur Mendarora. Hori dela eta, herritarrek euskaraz sortutako zortzi film labur ikusteko aukera izango dute, 18.00etatik aurrera eta doanik, San Agustin antzokian.

Laburbira euskarazko laburmetraien zirkuituak bi helburu ditu: «batetik, euskal zinemagintza bultzatzea, eta bestetik, arlo honetan diharduten zinemagileei haien lanak jendaurrean zabaltzeko aukera eman eta herritarrei euskaraz sortutako filmak ikusteko aukera eskaintzea».

Edonola ere, zortzi dira gaur ikusi ahalko diren filmak: Jone Arriola elgoibartarraren 'Dena asmatuta dago', 'Babesa' (Ander Iruretagoyena), 'Katalinaren zoria' (Guillermo Ordás), 'Erro' (Amaia Lejarreta), 'Mundu berri bat' (Mikel Alvarez), 'Zirrara' (Ane Cuesta), 'Talkak' (Ilune Diaz eta Jordi Nuet) eta 'Betizu buru' (Kim Maiteny).