Mendaro

'Herri bat, mila oroitzapen' argazki erakusketa irekiko dute gaur jubilatuen ondoko lokalean

Elgoibarko Izarra elkarteak eta Mendaroko Udalak herritar talde baten ekimenez antolatuta, denbora luzean Mendaroko abade izan zen Anjel Bazterretxeak (1936-2019) atera zituen argazkiekin osatutako 'Herri bat, mila oroitzapen' izeneko argazki erakusketa irekiko dute gaur arratsaldeko 18:00etan jubilatuen ondoko lokalean.

Hasiera batean erakusketa berri hau datorren ostegunera arte (hilaren 8ra arte) izango da ikusgai baina «beharra ikusiko balitz» 11ra arte luzatuko lukete. Edonola ere, 'Herri bat, mila oroitzapen' argazki erakusketa egunero bisitatu ahalko da.

Astelehenetik ostiralera bitartean 10:00etatik 13:00etara eta 17:00etatik 20:00etara egongo da irekita; eta larunbat eta igandetan, goizeko ordutegian.

Mendaroko Dantza modernoko ikasleek ikasturteari amaiera emateko 'Mendaro dantzan' izeneko jaialdia egingo dute gaur (21:00etan) Goñati pilotalekuan.

Ikuskizunean 7 eta 15 urte bitarteko 60 ikasle inguruk parte hartuko dute, eta bost taldetan banatuta egingo dute dantza: inurriak, izarrak, tximeletak, lehoiak eta Oinutsik taldeak.

Dantza eskolatik jakinarazi dutenez, gaurko jaialdian estilo urbanoko dantza ezberdinak ikusi ahalko dira.