Mendaro

Kultur proiektuetarako lehen udal dirulaguntzak uztailaren 19ra arte eskatu ahalko dira

Mendaroko Udalak herriko kultur proiektuak babesteko dirulaguntzak emango ditu aurten, lehen aldiz.

Udalak 10.000 euro bideratuko ditu dirulaguntza hauetarako eta onuradun izateko interesa duten herriko eragileek uztailaren 19ra arte aurkez ditzakete eskaerak, udaletxean (astelehenetik ostiralera, 9:00etatik 14:00etara) edota mendaro.eus webgunearen bitartez.

Udaletik azaldu dutenez, dirulaguntza berri hauen helburua «kultura-sare eraldatzaile, dinamiko eta parte-hartzailea sustatzea da, herritarren gozamenerako kultur eskaintza erakargarria, plurala, hurbila eta irisgarria sortuz». Dirulaguntza eskuratzeko, proiektuek «onura publikoko edo interes sozialeko helburua izan behar dute».