Mendaro

Mendaroko XX. Euskarazko ipuin lehiaketara lanak aurkezteko epea zabalik

Mendaroko Udalak abian jarri du Euskarazko ipuin lehiaketaren beste edizio bat, hogeigarrena dagoeneko, haur eta gazteen irakurzaletasuna eta sormena bultzatzeko xedearekin.

LH1etik DBH4ra bitarteko ikasleei dago zuzendua eta dagoeneko zabalik dago lanak aurkezteko aukera, azaroaren 30a bitartean luzatuko dena. Lehiaketa hiru mailatan dago banatua. A mailan, LH1etik LH4ra bitarteko haurrek parte hartuko dute eta euren lana ipuin bat irakurri (udaletxean, ludotekan eta liburutegian egongo dira) eta ondoren marrazki bat egitea izango da. B mailan, LH5etik DBH2ra, ilustrazio bat oinarritzat hartuz (udaletxean, ludotekan, gaztelekuan edo liburutegian egongo dira), ipuin bat egin beharko dute ikasleek. Eta C mailan azkenik, DBH 3 eta 4ko gaztetxoek, ematen den komikiaren (udaletxean, liburutegian eta gaztelekuan) bunbuiloak bete beharko dituzte.

Lanak udaletxean aurkeztu behar dira. Maila bakoitzeko irabazlearentzat 100 eurotan baloratutako saria egongo da eta parte hartzen duten guztientzat, berriz, oroigarria.