Mendaro

Otsailaren 3an aterako dira mendaroarrak Santa eskean

Aurten ere, ohiturari jarraituz, Santa eskean aterako dira Mendaron. Aurtengoan otsailaren 3an izango da, larunbatarekin, eta antolatzaileek herritarrak animatu nahi dituzte parte-hartzera. Horretarako, nahikoa izango da egunean bertan, udaletxe azpira agertzea goizeko 8:30ean. «Batzen garen guztiok hiru taldetan banatuko gara bertso kantari aritzeko», aurreratu dute. Talde bat Nerea Elustondo eta Amaia Agirre bertsolariekin Sahatsu mendira abiatuko da. Beste bat, Beñat Lizaso eta Aitor Salegirekin Mendarozabalera. Eta azkenik, hirugarren talde bat Iñigo Zubiaurre 'Beitxi' eta Aitor Zubikarairekin batera Aran Erreka auzora joango da. Batzen den dirua In Leike Kultur elkartearentzat izango da.

Goiza kantu kantari igaro ostean, Aizpe elkartean bazkari bikain batekin gozatuz bukatuko dute eguna.