Mendaro

Udalak bihar banatuko ditu 1.291 parte-hartzaile izan dituen XX. Ipuin lehiaketaren sariak

Goñati frontoiak bihar hartuko du (19:00etan) Mendaroko Udalak antolatzen duen eta inoiz baino partaidetza handiagoa izan duen XX. Euskarazko Ipuin Lehiaketaren sariak banatzeko ekitaldia.

Aurtengoan 1.291 parte-har-tzaile izan dira: 730 LH1-4ko ikasleentzako A mailan; 428 LH5etik DBH2ra artekoentzako B mailan eta 133 DBH3-4ko gazteentzako C mailan.

Biharko ekitaldian maila bakoitzeko lan onenaren egileak eskuratuko du saria (ordulari moderno eta liburu bana).

Txikinenen artean (hauek marrazki bat aurkeztu behar zuten) irabazlea Mutrikuko Goizeko Izarra ikastolako Maite Izagirre suertatu da. B mailan (ipuin bat aurkeztu behar zen) sariduna Elgoibar Ikastolan ikasten duen Malen Bilbao izan da. Azkenik, gazteen mailan (komiki bat aurkeztu behar zen) irabazlea Elgoibar BHI institutuko ikaslea den Nuhaa Furnier suertatu da.

Parte-hartzaile guztiek oroigarri bana jasoko dute (Udalak ikastetxeetara bidaliko ditu).