Mendaro

XII. Pintxo lehiaketa hilaren 27 eta 28an antolatu da herrian

Mendaroko Udalak herriko ostalaritza sustatzeko eta herriguneari bizitasuna emateko asmoarekin antolatzen duen XII. Pintxo lehiaketa prestatu du apirilaren azken astebururako. Aurtengoan lau izango dira lehiakideak: Aitz Beltz, Lagun Betikoak, Uztargi eta Ormola tabernak.

Udaletik jakinarazi dutenez, 2024ko pintxo lehiaketa hilaren 27an eta 28an burutuko da eta bi egun horietan sariketan parte hartzera animatu diren establezimenduek herritarren eskura jarri beharko dituzte okasiorako prestatutako pintxoak «12:00tatik 15:00etara eta 19:00tatik 21:00tara», hain zuzen ere.

Lehiaketara aurkeztutako pintxoak (taberna bakoitzak bat prestatuko du) 1,50 eurotan dastatu ahalko dira.

Aurreko urteotan bezala bi epaimahai izango dira Mendarioko pintxo lehiaketan eta horietako bakoitzak sari bana emango du (bordatutako mantala eta oroigarria).

Batetik, epaimahai teknikoa egongo da; eta bestetik, epaimahai herrikoia. Azken honetan txapelketako edozein pintxo jaten duen orok parte hartu ahalko du, bozketa-orritxoak betez. Gainera, bozketan parte hartzen dutenen artean taberna bakoitzean gastatzeko 50 euroko bi bonu zozkatuko dira, ekainaren 30era bitartean erabiltzeko.