Gaba Beltza, pandemiari aurre eginez

Joan zen urtean pandemia zela medio, ez zen antolaketarik izan, baina aurtengoan Gaba Beltza martxan izango da berriro. Ekitaldiak bihar ostegunez hasiko dira eta astelehenean bukatu. Bihar, ipuinaren ordua izango da Udal Liburutegian. Lur Usabiaga ipuin kontalariak, 'Zer dago nire armairu barruan?' ekitaldia eskainiko du arratsaldeko 17:00etatik aurrera Zabielen.

Ostirala izango du egunik zentralena; arratsaldeko 16:30ean, haur hezkuntza 3 eta 4ko ikasleen txanda izango da eta 18:00etan, haur hezkuntza 5 eta 6koena. Bi ekitaldiok Txantxangorri aisialdi taldekoek landuko dituzte. 19:30ean, 'Axuri Beltza' kalejira aterako da Talaixako Mamuarekin batera. Gure Ametsa dantza taldea, Akordeoi taldea, Txistularien banda eta Gaztetxekoak aterako dira denak kalejiran eta bukaeran 'Talaixako Mamua' erreko da Beheko plazan.

Larunbatean berriz musika izango da nagusi; 18:30ean, umeentzako disko festa izango da Beheko plazan 'DJ Kaktus'en eskutik, eta 23:00etatik aurrera 'DJ Rikki' izango da toki berean. Hurrengo zitak igandea eta astelehenean izango dira.