Mutriku

Malen eta Galbaixo jaien balorazioa egiteko galdetegia luzatu du Udalak

Udalak galdetegi bat prestatu du aurtengo Malen eta Galbaixo jaien balorazioa egiteko; Udalak egindakoaz aparte, herritarrek beraiek ere egin dezaten. Galdetegian Malen eta Galbaixo jaiei buruzko iritzia jasotzeaz gain, udan zehar antolatutako beste ekitaldiei buruzko iritzia ere jasoko da.

Galdetegia Udalaren Telegram kanalaren bitartez eta Facebook sare sozialeko Mutrikuko Udalaren perfilaren bitartez zabaldu da modu digitalean. Udalaren web orrian ere galdetegiari buruzko informazioa argitaratu da eta galdetegiaren esteka ere bertan jarri da. Horrez gain, aurtengoan paperezko euskarrian ere galdetegia erantzuteko aukera egongo da. Galdetegiak Liburutegian egongo dira eskuragarri eta bertan egongo da erantzundako galdetegiak bilduko dituen kutxa ere.

Udalak herritar guztiak bere iritzia ematera animatzen ditu. «Balorazioa egiteko herritarren txanda da orain».