Mutriku

'Mutrikuarrak eta Gerra Zibila' erakusketarekin abiatu dute Oroimen Asteko egitaraua

Mutrikuko Udalak herriko historia hurbila ez ahazteko urtero antolatzen duen Oroimen Astearen edizio berri bat abiatu zuen atzo, 'Mutrikuarrak eta Gerra Zibila' izeneko erakusketaren irekierarekin.

Erakusketa hori datorren ostiralera arte egongo da irekita Zabiel kultur etxean eta interesa dutenek 17:00etatik 19:00etara bitartean bisitatu ahalko dute.

Edonola ere, 2024ko Oroimen Astearen harira prestatutako egitaraua ez da hortan geratuko. Hurrengo hitzordua ostegunean bertan izango da.

Egun horretan herritar guztien partaidetzari irekita egongo den 'Nikolasa Agirrezabalagaren kalbarioa' izeneko hitzaldia izango da entzungai (19:00etan hasita) Zabielen.

Oroimen Astea borobiltzeko 'Oroimen Eguna' ospatuko dute datorren larunbatean Mutrikun, ohitura dutenez, Saturraran hondartza ondoan dagoen monolitoan (12.00etan) burutuko den ekitaldi batekin.