Soraluze

Baso Biziak taldeak urteko lehen zuhaitz landaketa antolatu du larunbaterako

Soraluzeko Baso Biziak elkarteak herritar guztien partaidetzari irekita egongo den 2024ko lehen zuhaitz landaketa antolatu du datorren larunbaterako Lurgaia Fundazioarekin elkarlanean.

Baso Biziak taldetik jakinarazi dutenez, oraingoan «zaharren egoitzaren jabetzako lurretan» landatuko dituzte zuhaitzak, beti ere, «ingurunearen birsortze naturalari laguntzen jarraitzeko».

Zuhaitz landaketa honetan parte hartu nahi duten herritarrek gaur arte eman dezakete izena info@lurgaia.org edo soraluzekobasobiziak@gmail.com helbideetara idatzita (gaian 'Landaketa Soraluze 20' jarri behar da eta mezuan partehartzaileen izen-abizena, adina, herria eta telefonoa zehaztu behar dira).

Edonola ere, parte hartzera animatzen direnek 09:00etan dute hitzordua Olako zubian (handik kotxeetan igoko dira ahalik eta ibilgailu gutxien erabilita).

Herritarrek edateko ura eraman behar dute baina hamaiketakoa antolakuntzak jarriko du.