Soraluze

Herriko pilotariek Ohorezko Euskal Ligako finalerdia jokatuko dute bihar Soraluzen

Herriko pilotazaleek ezinbesteko hitzordua dute bihar, 11:00etan, Arane kiroldegiko frontoian. Izan ere, Soraluze Pilota Elkarteko Ander Muruak eta Manex Balerdik Euskal Herriko klub mailako txapelketa ofizialik garrantzitsuena den Ohorezko Euskal Ligako finalerdia jokatuko dute ordu horretan, Iruñeko Oberena klubeko Elizalde eta Balerdiren kontra, hain zuzen ere.

Soraluze Pilota Elkartetik jakinarazi dutenez, «urtarrilaren 7an hasi zen Ohorezko Euskal Liga eta ligaxka amaituta, lehenengo postuan sailkatu dira Soraluzeko pilotariak. Horregatik, larunbat honetan etxean jokatuko dute finalerdia, partida bakarrera, ligaxkako laugarren postuan sailkatu zirenen aurka».

Edonola ere, hori ez da asteburu honetan Arane frontoian ikusi ahalko den partida bakarra izango. Izan ere, gaur bertan (19:15ean) herriko pilota elkarteko Ekain Ariznabarreta eta Zunbeltz Salaberriak (alebinak) eskuz binakakoa jokatuko dute Zumarragako bikotearen kontra eta bihar arratsaldean (16:00etan) benjaminek eskolartekoa izango dute Soraluzen.