Andoain

Andoaingo txotx denboraldiaren irekiera-ekitaldia, bihar Gaztañagan

Buruntza Auzo Elkarteak, Punttuka Bertso Eskolak eta Gaztañaga eta Mizpiradi sagardotegiek, herriko Udalaren laguntzarekin, antolatu dute ekitaldia. Antolatzaileek azaldu zuten bezala, «txandaka izango da txotx garaiaren irekitze ekitaldia, urtez urte. Aurten Gaztañagan izango da eta datorren urtean, Mizpiradin ».

Andoni Alvarezek (Andoaingo alkatea), Ainhoa Aiertzak (Buruntza Kultur Elkartea), Ion Belokik (irekitze ofizialeko protagonista), Axier Gaztañagak (Gaztañaga sagardotegia) eta Jon Mikel Arruabarrenak (Mizpiradi sagardotegia) egin zuten Andoainen lehenbiziko aldiz ospatuko den ekitaldiaren aurkezpena. Iragarri dutenez, Punttuka Bertso Eskolako kideek eta Sebastian Lizaso bertsolariak bertsotan jardungo dira afarian eta Aire Eire musika taldeak ere joko du bertan.

Arduradunek azaldu dutenez, afarira joateko, honako bi telefono jarri dituzte aukeran biharko txartela eskuratzeko: 630 122 562 edo 943 59 19 68. Gaur, urtarrilak 16, eguerdiko 13:00etan itxiko dute izena emateko epea. Egun horretako sagardotegiko menuak 35 euro balio du.