Andoain

Giro ederra Bertsokleta ekimenean, euskara eta natura uztartzeko antolatutako proposamenean

Otietako Bisitarien Etxeak antolatuta, Eli Pagolak eta Aitor Mendiluzek Bertsokleta ekimenean bertsotan jardun zuten Leitzarango bailaran barrena. Bi bertsolariak eta bertso zale taldetxo bat Udaletxe parean bildu ziren, beraien bizikletekin, eta bertan egin zuten lehenbiziko saioa. Lehen bertsoaldia amaituta, partaide bakoitza bizikleta gainera igo eta Plazaolako bideari ekin zion. Esan bezala, bidean hainbat tokietan egin zituzten geldiuneak, hala nola, Auzokalteko zubian, Bertxingo iturrian edo Unanibiko zubian. Azken hau, Sorginen zubia ere deitzen zaioa, ekimeneko azken geldialdia izan zen. Han, errekaren uraren soinuarekin, Pagola eta Mendiluzek sorginetaz, mitologiaz, naturaz... aritu ziren Bertsokletari amaiera borobila emateko.