Azpeitia

Aurrekontuak osatzeko auzoz auzoko bilerak hasiko ditu Udalak

Aurrekontuak Udalak duen bide orria jarraitzeko ezinbestekoak dira eta azken urteotan egin ohi izan duen moduan, ekitaldi honetarako ere Azpeitiko auzo desberdinetako bizilagunen beharrak ezagutu nahi ditu erakundeak urtean zehar erabiliko den dirua nola eta zertan inbertitu zehazteko. Gauzak honela, Azpeitiko bederatzi auzoetako bilerei Alde Zaharreko bizilagunena gehituko zaie. Asteazken honetan izango da hitzordua Basazabal jauregian. 19:00etan izango dira bilerak. Dainera, Oñatzen eta Lasaon ere izango dira bilguneak. Oñatzen, elizako lokalean eta Lasaon, berriz, auzo lokalean.

Alde Zaharreko bizilagunen kasuan, beharrezkoa ikusi du udalak bilera antolatzea, auzoko egitasmoen gaineko informazio eguneratua emateko aurrez aurre (etxe berriak, trastelekuak, parte-hartze prozesua...).

Bi astean zehar, gainerako auzoetako bilerak izango dira. Landetakoa izango da azkena, azaroaren 14an. Bileretara joan ezean, herritar orok izango du aurrekontuei ekarpenak egiteko aukera. Izan ere, guztiek jasoko dituzte etxean aurrekontu parte hartzaileei begira prestatutako eskuorriak. Ekarpenak idatzi ostean, postontziak egongo dira herriko sei puntutan (udaletxean, igerilekuan, liburutegian, Urrestillan, Jose Artetxe kalean eta Urbitarte auzoan) ekarpen horiek jasotzeko. Azaroaren 20an kenduko dituzte postontziak.

Internet bidez ere egin ahal izango dira ekarpenak, helbide honetara idatzita: www.azpeitia.eus/gardentasuna/iradokizunak-gardentasuna. «Herritarren ongizatean inbertitzen» jarraitu nahi du Azpeitiko Udalak, «kalitatezko zerbitzu publikoen eta azpiegitura egokien bidez». Horretarako, «ezinbestekoa da herritarren lehentasunen berri izatea. Elkarri entzun, eta elkarrekin aurrera egitea da helburua, azpeitiar guztion ekarpenekin, Azpeitia hobea egiteko», adierazi dute udal arduradunek.