Azpeitia

Auzolanaren bitartez landare haztegia bultzatu du Ekindarrek

Duela gutxi egin du Ekindar kooperatibak bazkideen batzarra eta bertan erabakita, hasierako proiektuan aurreikusten zuten landare haztegia martxan ipiniko dute. « Instalazio fotovoltaikoa landa eremuan izanik, balio erantsi bat eman eta inguruarekin bateragarria izateko helburuz aurreikusi zen haztegi hau», adierazi dute.

Bestalde, Ekindarreko komunitatea «indartzeko» eta «harremanak sendotzeko» aukera paregabea izango dela azaldu dute.

Gauzak honela, gaurtik, otsailaren 8tik, hasi eta landaketa auzolanean egitea pentsatu dute Kimu bat-ekoen laguntzaz. Hiru larunbat goizetan zehar elkartuko dira. Horretarako 15-20 laguneko lan taldeak beharko dituzte eta gaurkoaz gainera, beste bi larunbat aurreikusten dira lanerako.

Ekindarreko bazkideei auzolan honetara animatzeko eskatzen zaie. Parte hartu nahi duen bazkideek hurrengo estekan eman dezakete izena (https://erabili.liberaforms.org/hazitegiko-landaketa). Dena den, 943 119 806 telefonora deituta edota energia bulegoan izena ematea ere posible izango da (Done Jakue kalean dago, Frontoi Txiki alboan).